La «Missiun Capricorn» ha gia envidà per la 5avla giada pitschen e grond, giuven e vegl, ad ina concurrenza da bouldrar en il center da sport a Mustér. L'avantmezdi han radund 20 uffants participà a questa concurrenza. Il suentermezdi eran lura ils creschids vidlonder ed han empruvà da raiver differentas rutas - da schliar «problems» sco quai ch'i vegn numnà en quest sport.
Las rutas vegnan numnadas «problems». La finamira è da raiver fin sisum e da schliar uschia quest «problem».
Peter Grob è ensemen cun Iso Giossi responsabel per la concurrenza. Els han preparà las rutas ed uschia procurà per quels «problems». Quella persuna che vegn a schliar ils pli blers problems cun las pli paucas emprovas, gudogna.
Raivì vegn vid ina paraid grischa, in grip artifizial, ch'è varga 3 meters aut. Il palantschieu è cuvrì cun mattas lomas, uschia ch'il raivider e la raividra na sa fa betg mal, cura ch'el ni ella siglia u croda. Bouldrà vegn numnadamain senza suga, sulettamain stgalfins da raiver èn necessaris.
Forza, mobilitad e coordinaziun
In pèr rutas paran propi dad esser difficilas. Ils raividers e las raividras ston mintgatant empruvar pliras giadas, fin ch'els han success. Ils elements èn per part fitg pitschens e fins, uschia ch'ils raividers pon sa tegnair cun mo 1 u 2 dets. En auters cas èn ils elements bain gronds, dentant cun bunamain nagina structura, e quatras fitg glischnus.
Bouldrar pretenda oravant tut forza maximala. Ma i dovra era blera mobilitad e coordinaziun. Quest suentermezdi penda bain inquala persuna vid ina paraid cun las chommas insanua sur il chau ed ils bratschs en posiziuns nunusitadas.
-
Bild 1 von 4. Bildquelle: RTR.
-
Bild 2 von 4. Bildquelle: RTR.
-
Bild 3 von 4. Bildquelle: RTR.
-
Bild 4 von 4. Bildquelle: RTR.
Mintgatant na chatta la raividra u il raivider nagina soluziun. Ma exact quai para dad esser la fascinaziun dal bouldrar.
La sfida da schliar il problem ma fascinescha vi dal bouldrar. Guardar, tge vias ch'i dat ed adina puspè empruvar, fin ch'i gartegia.
Ils ultims onns è il bouldrar daventà adina pli popular tar las persunas. Questa tendenza ha era Peter Grob constatà.
Durant ils ultims 20 onns è la popularitad dal bouldrar creschida enormamain. Quai mussa era il fatg ch'adina dapli hallas da bouldrar èn vegnidas construidas.
Iso Giossi ch'ha organisà ensemen cun Peter Grob quella concurrenza da bouldrar vesa era l'aspect da la cuminanza sco impurtant factur, che fa quai sport attractiv per la glieud. Era sche mintgin raiva per sasez, saja quai in sport da cuminanza. Ins motivescha l'in l'autra, dat cussegls e gida uschia che mintgin e mintgina po schliar uschè blers problems sco pussaivel.