Sco adina han ils zains da la baselgia parochiala da s. Gions a Mustér clamà ils 24 da december 2025 al servetsch divin da las 17:00. Ma tuttenina ha il zain grond pers sia vusch. «Nus eran semtgads per il servetsch divin. Lura hai jau udì ina curiusa canera e curt suenter n'è il zain grond betg pli stà d’udir», di Gion Tenner che seseva a l’orgla per intunar la messa festiva da vigilgia Nadal.
Il battagl è rut
In’inspecziun en il clutger per guardar daco ch’il zain grond na tuchia betg pli ha schlià il lign. «Il battagl è rut permez e sa distatgà dal zain. Quest toc cun in pais tranter 80 e 100 kilos è crudà e ha perfurà dus plafonds cun aissas da mintgamai tschintg cm avant ch’el è sa franà tranter ils quaders d’in terz plafond», di Gion Tenner che n'è betg be organist da la plaiv, mabein er responsabel per las immobiglias da quella. Fiss il battagl crudà era tras il terz plafond avess el pudì chaschunar grond donn vi da l'indriz da l’ura baselgia. «Gnanc da pensar tge che fiss capità sch’el fiss crudà da la vart ora tras la fanestra dal clutger», constatescha Gion Tenner. La part sisum dal battagl penda anc adina vi dal zain, ma damai che la part principala che procura per il tun è curdada, resta il zain grond ord funcziun il mument. L'entir battagl ha in pais da radund 200 kilos.
-
Bild 1 von 2. Il battagl ha perfurà las aissas da dus plafonds avant ch'el è stà airi tranter ils quaders d'in terz plantschiez. Bildquelle: Gion Tenner.
-
Bild 2 von 2. Per auzar e francar la part dal battagl cun in pais da 80-100 kg è la forza da quatter persunas stada necessaria. Bildquelle: Gion Tenner.
Ina gruppa dals pumpiers ha lura francà la part dal battagl ch’è crudada.
Quai n'è betg stà uschè simpel, damai ch’igl è fitg stretg en il clutger. Vitiers vegn ch'il toc è grev ed ins na sa strusch co tschappar en el.
En quatter persunas saja dentant reussì da fermar e segirar el sin in quader. Ils 6 da schaner 2026 vegn interpresas da zains a prender invista dal donn e prender mesiras per construir in nov battagl. Suenter vegni ad esser necessari d’auzar quel cun ina tschaghegna sisum il clutger e montar el vid il zain grond. Medemamain ston ils plafonds donnegiads vegnir reparads. Con ditg ch’i va enfin ch’il battagl nov è montà en il zain n'ha Gion Tenner betg pudì dir.
In zain dal 1916
«Jau na sai betg sa regurdar d’in sumegliant schabetg tar nus. Apparentamain capita quai tuttina ina giada u l’autra», di Gion Tenner. L’interpresas che saja vegnida contactada saja confruntada cun in schabetg sumegliant a Mels. Il temp da las festas da Nadal èn ils zains savens en funcziun e la probabilitad ch’insatge sumegliant po capitar, è sa chapescha pli gronda lura. Il zain grond da la baselgia parochiala da s. Gions a Mustér datescha dal 1916. Incaps n'haja mai dà dapi lura.
Avant 16 onns avain nus revedì l'entir tutgiez e vulvì ils zains per 1/8. Quai è necessari per ch’il battagl tucchia betg adina la medema part dal zain.