Suenter 23 onns va il possessur da la stizun da chalzers a Mustér Giusep Caduff-Kneidinger en pensiun. Il motiv è ch’el sto ora da las localitads actualas sin la fin da l’onn ed ina successiun per la stizun da chalzers n’ha el era betg chattà uschia ch’igl è fin cun ils 23 da december per l’um che vegn l’auter onn 70 onns. La clientella fidada vegnia a mancar ad el, quai saja stà sia motivaziun da vegnir a lavurar e pir cura ch’il di da serrar las portas vegn pli datiers realiseschan ins, che uss èsi propi uschè lunsch da serrar, di l’um ch’ha oriundamain emprendì da cuschinier.
Da la cuschina en stizun da chalzers
La casualitad ha manà avant 23 onns Giusep Caduff en la stizun da chalzers da Rico Flury. Lez era vida vender ora ses chalzers e per spass haja el detg ch’el cumpria la stizun. Sia dunna n’era il prim betg propi cuntenta cun la decisiun, ma ella haja gidà tut quels onns, perquai ch’el gidavi anc blers onns en cuschina da la chasa d’attempads a Sedrun. Ils ultims onns haja el alura manà sez sia stizun da chalzers, di l’um cun in surrir. E cura ch’ins ha chattà ils dretgs products alura vegn la glieud era a cumprar ils chalzers en stizun. Ils ultims onns haja el propi giu grond success cun la vendita da chalzers, surtut era a possessuras e possessurs da segundas abitaziuns. Ma la clientella era propi multifara e mirà sur tut quels onns sajan vegnidas da la pli differenta glieud en stizun.
Ils proxims mais anc sin fiera a Glion
Dasper la vendita da chalzers ha Giusep Caduff era adina vendì vins e vinars, ina sparta ch’el ha surpiglia da ses geniturs e ch’el vegn era a mantegnair vinavant. Era vegnia el a partir da la primavaira ad esser ina giada il mais sin la fiera a Glion per vender anc ses sortiment e lura haja quai propi num giudair la pensiun. E cunquai che sia dunna è da l’Austria ed els han era ina chasa là vegnian els a passentar uss senza obligaziuns era da plirs dis en l’Austria e surtut giudair.
