Mustér - Nov post per prender encunter selvaschina

Container per prender encunter selvaschina

Per ch'il chantun po far sia statistica ed er planisar la proxima chatscha èn ils chatschaders e las chatschadras grischunas clamadas da mussar lur preda tar il guardiaselvaschina. En mintgin dals 12 districts da chatscha datti perquai posts che vegnan tgirads dals guardiaselvaschina per mussar la preda. Radund 85% dals chatschaders vegnian a mussar lur preda directamain suenter che l'animal è vegnì sajettà.

Chattar localitads adattadas è ina sfida

Da chattar localitads adattadas u posts nua ch'ins possia integrar il post da prender encunter selvaschina saja ina sfida en l'entir chantun, di Lukas Walser, manader da la partiziun chatscha e selvaschina tar l'Uffizi da chatscha e pestga dal Grischun. Durant examinar differents lieus e localitads saja il chantun vegnì a savair, ch'i dettia furniturs che porschian entirs containers, gia equipads. En il container as haja tut quai ch'ils guardiaselvaschina dovrian per lur lavur. Actualmain as saja vid examinar en l'entir chantun differents posts nua ch’ins possia examinar en il futur la selvaschina. Il container a Mustér saja in prototip, che pudess esser adattà per auters lieus. Ins haja gia en mira auters lieus nua ch'i pudess en l'avegnir er dar in container per prender encunter la selvaschina.

Il nov post è in success

En il container a Mustér, ch'è davent da questa stagiun da chatscha il nov post da prender encunter selvaschina hajan els mesirà or tranter 250 e 300 animals, quai che saja in zic dapli che l'onn passà, di il guardiaselvaschina Thomas Durschei. El è in da trais guardiaselvaschina che lavuran a partir dal settember da quest onn en il nov post. I dettia anc pitschnas chaussas d'optimar, sco per exempel dapli glisch a l'entrada u ina curuna che manchia anc, mo tut en tut saja la bilantscha suenter l'emprima stagiun da chatscha fitg positiva.

Avant han ils guardiaselvaschina prendì encunter ils animals en localitads da l'Uffizi da construcziun bassa gist dasperas. Dad avair in local mo per els fetschia pli simpel e pli speditiv la lavur. Gist a l'entrada hai in indriz per pender si ils animals e pasar els, avant il container hai avunda plaz per rangar cun in char annex. Er il pitschen local da sfradentar en la part davos dal container saja in grond plus, di Thomas Durschei. Er dals chatschaders da Mustér, Medel e Tujetsch ch'èn vegnids a mussar lur animals al nov post haja dà inqual resun, quels sajan per gronda part stads positivs.