Il suveran da Mustér ha acceptà cun 472 cunter 436 vuschs il Contract per il dretg da construcziun tranter la vischnanca e l'Ovra Solara Magriel SA. Quai correspunda ad ina cumpart da Gea da 52%. Sa participads èn 63,3% dals votants e da las votantas. Uschia po la dumonda da bajegiar vegnir inoltrada.
Gia ils 22 d'october 2023 ha il suveran da Mustér decidì cun 66% Gea ch'el vul da principi laschar realisar la producenta d'electricitad Axpo e las pendicularas da Mustér in'ovra solara sin l'Alp Magriel.
Il project è vegnì adattà
Ils panels da solar na duain betg vegnir construids sco prevesì sin uschenumnadas «maisas», mabain vegnir stendids sin ina construcziun da sugas. Quai per pudair suandar al sulegl ed uschia daventar pli efficient.
Cunquai che las construcziuns dovran dapli plaz e perquai ch'ils planisaders han stuì excluder ina zona per motivs d'ambient, munta la surfatscha totala ussa 140'000 meters quadrats enstagl da 98'000 meters quadrats.
L'indriz fotovoltaic duai producir energia per 3'000 chasadas.
100'000 francs ad onn per Mustér
La vischnanca da Mustér survegn in tschains da basa annual independent da la producziun. Quel munta a 100'000 francs e quai gia a partir partir dal 2024. Era survegn la vischnanca ina cumpart da 10% dal gudogn da fatschenta.
