La destinaziun da Mustér è enconuschenta tar las parasguladras ed ils parasguladers en Svizra ma era sur ils cunfins. Dapi passa 10 onns vegnan fatgas cursas internaziunals e savens era campiunadis svizzers. Era quest onn è il campiunadi svizzer durant in'emna a Mustér.
Per levgiar a las pilotas ed ils pilots la vita, porscha il comité d’organisaziun dapi l’entschatta gia pussaivladads per mobils da campar e bus da star sur notg. Surtut che tut saja datiers, las pendicularas, il lieu d’atterrar e la gastronomia apprezieschian tuts fitg, di Marc Demont ch’è dapi passa 10 onns en il comité d’organisaziun. La collavuraziun cun las possessuras da terren ed ils purs che tgiran quel, ma era cun la gastronomia e la hotellaria saja fitg buna. Pertge simpel da chattar per tuts in suttetg per in'emna na saja betg simpel, di Marc Demont. Perquai saja la soluziun davant la Catrina Lodge, l’anteriur hotel Sax, ina soluziun ideala.
-
Bild 1 von 6. La convivenza ha sper la concurrenza la pli gronda prioritad. Bildquelle: RTR.
-
Bild 2 von 6. La mesemna passada n'era quai betg aura per sgular, sulet pitschens exercizis eran pussaivels da far, gist sper il campadi provisoric. Bildquelle: RTR.
-
Bild 3 von 6. Marc Demont fa gia passa 10 onns part al comité d'organisaziun. Bildquelle: RTR.
-
Bild 4 von 6. Ils busins ed ils mobils han chattà in plaz dasper la plazza d'atterrar da las pilotas ed ils pilots. Bildquelle: RTR.
-
Bild 5 von 6. Roger Aeschbacher dal chantun Berna fa part da l'equipa naziunala da parasgular, ma giauda era la convivenza dasper las concurrenzas. Bildquelle: RTR.
-
Bild 6 von 6. Bildquelle: RTR.
Il di ora concurrents – la saira vegn cuschinà ensemen
Ins possia propi dir ch’els sajan ina pitschna famiglia. Il sport da parasgular saja en sasez in sport fitg individualistic, ma cura ch’ins sa vesia la saira alura chattian ins adina temp da seser ensemen e discussiunar, di Romain Binggeli che vegn da Genevra.
Era Roger Aeschbacher che fa part da l’equipa naziunala da parasgular vesa il campiunadi svizzer sco trenament per las concurrenzas internaziunalas. Uschia possian ins profitar in da l’auter, betg mo en l’aria, mabain era la saira possian ins discussiunar sur da las cursas e sur da la passiun communabla, il parasgular. Er in motiv da la buna convivenza saja che quasi nagin possia viver da quest sport e perquai saja propi la passiun per il sgular tar ils blers la motivaziun principala e cun persunas che partan la medema passiun saja simpel da viver ensemen, di Roger Aeschbacher e mira sper ses mobil ora sin ils ulteriurs rodund 30 mobils ch’han quest'emna chattà plaz a Mustér.