Ils 28 da settember ha la populaziun da la vischnanca da Glion da cumplettar il parlament communal per la proxima legislatura che entschaiva il prim da schaner 2026.
Nagina tensiun tar l'emprim scrutini...
Las elecziuns communalas dals 18 da matg a Glion n'han betg bittà grondas undas. Ni per il presidi communal ni per la suprastanza hai dà in cumbat electoral. La tensiun era tar nulla.
Tuttina tar il parlament: Durant il temp d'annunzia uffizial n'hai gnanc dà avunda candidats e candidatas per occupar tut ils 25 sezs. Pir curt avant las elecziuns eran intginas persunas anc s'annunziadas. La fin finala han 20 persunas dumagnà l'elecziun en il parlament e 6 n'han gì nagin success.
Per il segund scrutini datti ussa 12 candidaturas per ils 5 sez libers.
...però cun gronda midada en proxima legislatura
Il parlament da Glion vegn a sa midar radicalmain sin la proxima perioda d’uffizi. Uschia vegnan 14 dals 25 sezs occupads cun novas persunas. Il parlament na sa regiuvinescha però betg mo dal dumber ennà, mabain era en la vegliadetgna. Ils parlamentaris e las parlamentarias gia elegì han ina vegliadetgna media da stgars 40 onns. E la vegliadetgna media dals candidats e las candidatas per il segund scrutini han en media stgars 43 onns.