Siglir tar il cuntegn

Header

Rumida da naiv, pass Lucmagn.
Legenda: Rumida da naiv, pass Lucmagn. RTR, HUBERT GIGER
cuntegn

Pass dal Lucmagn Consorzi tessinais po rumir la naiv il proxim enviern

Uss èsi cler tgi che rumescha la naiv sin il Lucmagn il proxim enviern: Il Tribunal federal ha refusà in recurs fatg da las firmas che rumivan fin uss la via dal pass. Uschia dastga la Pro Lucmagn surdar las lavurs per ils proxims 10 onns a duas firmas tessinaisas.

«La decisiun dal Tribunal federal è impurtant per che la nova cuminanza da lavur Edelweiss dal Tessin possia sa preparar sin il 1. da november, cura ch'il nov contract da lavur entschaiva.» Quai ha il president da la Pro Lucmagn, Martin Candinas ditg a RTR. La cuminanza da lavur, Berther SA da Mustér, Transports Bundi da Curaglia e Scaresa SA dad Olivone avevan inoltrà in recurs al Tribunal federal cunter la decisiun da la Dretgira administrativa dal Grischun e pretendì in effect suspensiv.

Quest effect avess muntà che la Pro Lucmagn n'avess betg dastgà surdar las lavurs da rumida enfin ch'il Tribunal federal ha decidì en chaussa. La dumonda per effect suspensiv ha il Tribunal federal refusà e la Pro Lucmagn ha suttascrit ils contracts da lavur per ils proxims 10 onns cun il consorzi da lavur tessinais Edelweiss.

Tgi sto pajar?

Uss ha il Tribunal federal anc da decider la dumonda, sche la Pro Lucmagn ha fatg sbagls da procedura cun surdar las lavurs da la rumida da naiv sin il Pass dal Lucmagn al nov consorzi. Cunquai che la Pro Lucmagn ha surdà las lavurs, na vai betg pli per la dumonda, tgi che dastga exequir las lavurs, mabain sulet per la repartiziun dals custs che la procedura ha chaschunà.

RTR novitads 17:00

Artitgels legids il pli savens

Scrollar a sanestra Scrollar a dretga