Suenter la critica da las pendicularas da Sedrun-Andermatt e Mustér è vegnì reponderà la decisiun da las duas suprastanzas communalas da Tujetsch e Mustér. Ma els restian tar la decisiun da far la midada, ha ditg Robert Cajacob president da vischnanca da Mustér.
Las vischnancas possedan las aczias
La cumpart d’aczias vegn repartida sin las duas vischnancas, ha ditg Robert Cajaco. Il cussegl d’administraziun na saja dentant anc betg sa constituì definitivamain. Las vischnancas hajan il dretg da metter dus represchentants da la suprastanza communala. A Mustér saja quai il president ed a Tujetsch il suprastant Renato Decurtins. Uss possian las duas vischnancas proponer ina persuna betg da la politica, a Mustér saja quai Iso Mazzetta ed a Tujetsch Dany Gygli, els eran fin uss medemamain en suprastanza da l’uniun Sedrun Mustér Turissem.
Anc betg decis tgi che las pendicularas proponan
Anc betg decis è tgi che las ulteriuras trais persunas en il cussegl d’administraziun èn. Uschia han las pendicularas, ils possessurs da segundas abitaziuns ed era l’uniun da commerzi cun l’uniun da gastro da mintgamai proponer ina persuna. Era anc betg decis è tgi che duai presidiar il cussegl d’administraziun, quai vegnia dentant a succeder uschè svelt sco pussibel, di il president da vischnanca da Mustér Robert Cajacob.
RTR novitads 17:00