Il parlament communal ha approvà cun 14 cunter 0 vuschs il dretg d’aua per las pendicularas da Mustér. Uschia pon las pendicularas installar duas turbinas per producir en l’avegnir electricitad. Ina è planisada a l’entrada dal lai da reserva amez il territori da skis, l’autra datiers da la staziun a val e dal resort Catrina. En in emprim pass ston las pendicularas dentant realisar la segunda etappa dal sistem d’ennavar davent da Caischavedra fin a la staziun a val. Quellas lavurs duajan cumenzar anc quest onn, u il pli tard l’onn proxim. Era perquai che la populaziun da Mustér ha l’ultim pled a l’urna, probabel anc il zercladur e la regenza grischuna sto la finala era anc approvar il project.
Indemnisaziun per vischnanca
La producziun da las duas turbinas na surpassa probabel betg 1 MW. Uschia na stuessan las pendicularas betg indemnisar la vischnanca tenor dretg vertent. Tuttina survegn la vischnanca radund 35’000 francs annualmain da las pendicularas da Mustér. Era vegn segirà che la corporaziun d’aua ed era la vischnanca pon en situaziun da mancanza d’aua refusar da dar giu aua per la producziun d’energia e per far naiv, quai eran dumondas avertas tar l’emprima lecziun l’emprim da mars. Uschiglio ha la suprastanza en la segunda lecziun pudì respunder a tuttas dumondas avertas. Il parlament n'ha numnadamain betg gì admoniziuns u dumondas supplementaras.
Revisiun parziala da la zona spazi d’auas
Era tractada è vegnida la segunda fatschenta nua ch’il spazi d’aua en la val da Cuoz e la val Sogn Placi ha stuì vegnir adattads. Il motiv è che las lavurs per la via da guaud planisada, sco era en connex cun la meglieraziun funsila possian cuntinuar, uschia ha la suprastanza declerà. Cun la midada po la via vegnir manada datiers dals flums ed uschia guntgir ils lieus abitads. Da discussiunar ha dà la dumonda da las zonas da privel ch’èn definidas dapi il 2013 e che na pon betg vegnir midadas. La revisiun da la planisaziun locala vegn uschia a pussibilitar da realisar las vias planisadas. Era quella fatschenta sto anc vegnir suttamessa a la votaziun a l’urna.
