Tegnair avert la via sur il Pass dal Lucmagn durant l’enviern è ina gronda sfida e munta blera responsabladad per ils dus incumbensads da la Pro Lucmagn, Otti Flepp e Filippo Genucchi. Sur plirs onns ha Sara Testoni accumpagnà els fotograficamain durant las lavurs che ston vegnir fatgas cura che la barriera è serrada. Il resultat è ina exposiziun da fotografias ch’è stada da vesair sin il Pass dal Lucmagn sco er ad Olivone. Uss èn quellas da vesair fin la fin da mars en l'hotel Medelina a Curaglia.
Relaziuns persunals han manà al project
La casualitad che Sara Testoni è l’amia da Filippo Genucchi ha manà a l’idea per il project. Uschia ha ella pudì accumpagnar fitg stretg las lavurs sin il pass e las fotografias mussan ina part da la lavur che sto vegnir fatga. Bleras fotos sajan naschidas casualmain, autras sajan propi vegnidas fatgas sapientiv gist en quel lieu, di Sara Testoni ch’abita dapi quasi 10 onns en la Val Blegn a Castro. Cun accumpagnar las lavurs haja ella er emprendì bain d’enconuscher il Pass dal Lucmagn ed er la vart grischuna. L’interessant saja ch’ins possia passar bleras giadas in lieu e giada per giada possian ins vesair insatge da nov.
Fotos en nair ed alv
Sara Testoni n’è betg fotografa da professiun e per ella è l’exposiziun l’emprima. Ella n'avess mai s’imaginà ch’ella possia far ina tala exposiziun in di, per ella saja quai ina gronda fortuna, raquinta Sara Testoni. Sin tut las turas ch’ella ha pudì accumpagnar ha ella fatg radund 7’500 fotografias, da quellas ha ella tschernì 22 ed exponidas èn il mument 16.
Tuttas èn da vesair en nair ed alv, uschia vesian ins meglier ils cuntrasts e la fascinaziun da la naiv cun las maschinas, raquinta la dunna ch’ha emprendì d’assistenta da veterinari. Las dimensiuns ch’èn da vesair, per exempel durant las lavurs da rumida, l’uman cun sia maschina paria propi pitschen cunter las forzas da la natira – quai haja ella vulì mussar. Ma er situaziuns quotidianas, sco per exempel il barat dal survegliader da la vart dal sid e dal nord.
Sia foto preferida per exempel è vegnida fatga a la fin da la gallaria sin il Pass dal Lucmagn. Quella fotografia saja quasi gia istorica, perquai che cun la prolungaziun da la gallaria sin il Lucmagn na saja la lavina uss nagin privel pli, quai ed ils cuntrasts da stgir e cler saja il bel vi da la foto, declera Sara Testoni.
