Siglir tar il cuntegn

Header

audio
Medis da chasa: Lescha federala blochescha regiuns
Or da Actualitad dals 21.11.2022. Bild: Keystone
laschar ir. Durada: 3 minutas 48 Secundas.
cuntegn

Problem per las regiuns Lescha impedescha la successiun da medis da chasa

La successiun d’ina media u d'in medi da chasa è savens ina sfida. Per l’ina na datti betg bleras medias giuvnas che vulan daventar medi da chasa, per l’autra impedescha la lescha federala davart l’assicuranza da malsauns la successiun.

La lescha è entrada en vigur il 2021 e vul evitar che memia bleras medias e medis pratitgeschan en Svizra. Uschia vegn pretendida ina savida en connex cun la lingua e la mentalitad, ma er in'experientscha da trais onns en in ospital ubain in'autra instituziun medicinala renconuschida en Svizra. Quai impedescha savens ina successiun tar medis da chasa, igl ha dà plirs da quests cas quest onn en il chantun Grischun. Il chantun haja gia avant che la lescha vegn introducida fatg attent che questa lescha impedeschia la segirtad da basa medicinala, di Rudolf Leuthold, parsura da l'Uffizi da sanadad grischun.

Cumissiun da sanadad vul far midadas

La cumissiun da sanadad dal Cussegl naziunal ha inoltrà ina nova proposta per levgiar il access ad il numer ch'in medi dovra per quintar da la cassa da malsauns. Quel numer survegn in medi il mument be cun trais onns experientscha. I duai dar excepziuns per ils medis da chasa, ma era per medis d’uffants e da psichiatria d’uffants, ha ditg Barbara Gysi, la vice-presidenta da la cumissiun. La midada da la lescha duai vegnir preschentada la fin da november al Cussegl federal e tractada en il parlament en la sessiun da proxima primavaira. Uschia pudess la midada vegnir en vigur anc a temp.

Las midadas èn urgentas

Ma per las medias ed ils medis che han il mument nagina successiun pervia da la lescha èsi in dilemma. Uschia per exempel a Trun, nua ch’il medi Markus von Gradowski vul surdar sia pratica, ma la lescha vertenta impedescha quai. Sumegliant èsi a Glion en la pratica communabla da l'ospital chantunal, era là hai ina media ma ella na po betg pratitgar suletta, di la directura da l'ospital regiunal da la Surselva, Claudia Käch. Tant per il chantun sco era per las medias ed ils medis dovra quai urgent quella midada per segirar il provediment medicinal da basa.

RTR actualitad 12:00

Artitgels legids il pli savens

Scrollar a sanestra Scrollar a dretga