Siglir tar il cuntegn

Header

Legenda: Christian Loretz / MAD
cuntegn

Punt pendenta a Mustér Dumonda da bajegiar vegn inoltrada, er senza finanziaziun segira

Fin uss mancan anc radund 1,4 milliuns francs per bajegiar la punt pendenta a Mustér. La lubientscha da bajegiar duai gidar da rimnar daners, uschia ch'ins po cumenzar da bajegiar il 2024.

Suenter che la regenza ha dà glisch verda, sto anc la vischnanca dar la lubientscha per la punt pendenta a Mustér. Per gliez vul l'Uniun «la pendenta» inoltrar la dumonda da bajegiar l'emna proxima, uschia ha ditg il president da l'uniun Christian Loretz envers la FMR.

La finanziaziun da la punt pendenta tranter Mustér e Mompé Medel è però anc averta. Tenor Loretz èsi fin uss gartegià da rimnar 400'000 francs da privats e privatas ed interpresas da la regiun. Ils custs totals per la punt èn tenor calculaziuns 1,8 milliuns francs.

Planisà d'avair ensemen daners sin la stad

L'uniun spera sin contribuziuns dal chantun, da las vischnancas e da fundaziuns. Quellas veglian dentant per part emprim vesair ina lubientscha da bajegiar avant che conceder daners. Persunas privatas pon contribuir cun sponsurar in meter da la punt per 1'000 francs – 106 persunas hajan gia decis per in tal sustegn.

La finamira saja d'avair ensemen ils daners, sin la fin da la stad. Sch'ins veglia cumenzar cun las lavurs l'auter onn stoppian ins empustar las sugas d'atschal il settember. Cun ina lunghezza da 280 meters ed in'autezza da fin a 100 meters duai la punt da Mustér daventar la punt pendenta la pli lunga en il Grischun.

La construcziun da la punt surprendan interpresas spezialisadas, las lavurs da fundament duain sche pussaivel interpresas da la regiun far.

audio
Per tadlar: las novitads da las 06:00
ord RTR Audio dals 06.01.2023.
laschar ir. Durada: 5 minutas 19 Secundas.

FMR / Giuachin Kreiliger

Artitgels legids il pli savens

Scrollar a sanestra Scrollar a dretga