Era l’ultim di che la stizun da Rabius è stada averta èn las fidaivlas clientas stadas a cumprar per l’ultima giada en lur stizun dal vitg. Per tut las persunas vegnidas era quai in di trist, ma uss na possian ins betg pli midar la situaziun. Er ils responsabels da l’associaziun han empruvà tut per pudair mantegnair la purschida, ma la finala èsi stà l'ultima soluziun per evitar da far debits, uschia Robert Candinas, il president da l'Associaziun da consum Rabius/Surrein. Tut las stentas per augmentar la svieuta da la stizun da Rabius n’hajan betg purtà il resultat giavischà. Quest pass da serrar la stizun da Rabius saja necessari per evitar il concurs da l’Associaziun.
La stizun a Surrein resta averta
A media vista èsi planisà da transfurmar quella en ina stizun ch'ha avert durant 24 uras al di e 7 dis l’emna per pudair spargnar custs da persunal. Avant questa decisiun aveva ina gruppa da lavur tramess en tut las chasadas da Surrein e Rabius, sco er als possessurs da segundas abitaziuns ed a las interpresas in questiunari cun dumondas davart l’avegnir da la stizun da Rabius. Per gronda part è sa mussà che la purschida è buna e surtut ils products indigens sajan tschertgads. Las cifras mussan però in auter maletg.
Or da l'archiv:
