Armin Cadalbert, bab da duas mattatschas, è fitg surprais, cura che sias figlias vegnan in di a chasa e din ch'ellas hajan gì da prender penetienza. Las scolaras ed ils scolars han gì dad ir singuls cun il prer en la sacristia. Quai na saja betg bun ch'ins fetschia quai en quella moda e maniera. Ils geniturs na sajan betg vegnids infurmads ordavant, di Armin Cadalbert. El ha telefona al president ed al plevon per survegnir scleriment. La plaiv ha respundì ch'il prender penetienza stoppia vegnir fatg uschia. Plinavant n'haja il bab da las duas mattatschas betg survegnì respostas concretas. El haja il sentiment che la plaiv mettia ils geniturs sut squitsch. Quai tenor la devisa: Ils geniturs pon sa participar en la baselgia u betg.
Nagina emprima communiun quest onn
Ils geniturs dals uffants ch'avessan en curt gì l'emprima communiun èn sa decidids da betg acceptar la tenuta da la plaiv. Els na fetschian quest onn nagina emprima communiun, perquai che la plaiv na saja betg stada transparenta en sia communicaziun. Plinavant aveva ina brev da la plaiv procurà per dapli dumondas che respostas. Ina sesida cun la plaiv haja laschà resentir ils geniturs ch'els na vegnian betg involvids, cura ch'i va per la festa ed il tema difficil dal prender penetienza, uschia ils geniturs.
Communicaziun transparenta manchia
Far prender penetienzia uffants senza la savida dals geniturs duess er tenor il codex da cumportament per collavuraturs dal uvestgieu vegnir evità. Tranter auter duess il spiritual esser transparent envers las persunas cun represchentanza legala dals uffants, quai era per sia atgna protecziun. La Plaiv Rueun, Ruschein, Siat e Pigniu na prenda betg posiziun davart la situaziun a Rueun. Ses president, Duri Coray, di dentant che la plaiv avess pudì communitgar meglier.
I dat er autras pussaivladads
RTR ha dumandà l'uvestg Joseph Maria Bonnemain davart quest tema. El na possia betg prender posiziun davart il cas da Rueun, ma el di, ch'el possia dar in exempel sco ch'el enconuscha la confessiun cun uffants. A Turitg haja el celebrà cun glieud giuvna in devoziun da penetienza cun il focus sin l'examen da conscienza. Ils uffants sajan stads repartids en baselgia ed hajan gì da reflectar il tema e far oraziun. Las persunas ch'han giavischà in discurs persunal, hajan pudì far quai a la fin. Per survegnir l'absoluziun na dovria betg la penetienza persunala, uschia Joseph Maria Bonnemain.
Tut las persunas che lavuran tar l'uvestgieu en l'assistenza spirituala e ductrina han dad ir proximamain a scolaziuns en connex cun il codex da cumportament. Ils geniturs da Rueun speran che la situaziun meglierescha, uschia ch'ils uffants possian prender suenter lur l'emprima communiun en in onn.
Or da l'archiv:
