La vischnanca da Sagogn investescha questa stad ina summa da 325'000 francs per in object spezial: la punt da sugas sur il guaud da la Val Mulin. Mardi han ins installà il plazzal. Per quest intent ha il helicopter stuì sgular giuaden en la val il material.
Sin il plaz da sa tschentar dal helicopter, a Val Casti, era massa rauba da gronda dimensiun semtgada: in generatur, in excavatur, il container da material e per suttetg, pitgas, aissas, iseglia e bler auter. Enturn las 15:00 è il vehichel da l'aria arrivà da Vaz Sut ed ha cumenzà a far il transport giuaden en la Val Mulin. Quella situaziun è stada mardi passà, ils 9 da zercladur 2026.
-
Bild 1 von 2. Mardi ha il helicopter sgulà material da construcziun en la val. Bildquelle: FMR.
-
Bild 2 von 2. La punt veglia è oriundamain in bratsch d'ina tschaghegna. Bildquelle: FMR.
Avant 25 onns, ils 11 da zercladur 2001, aveva la populaziun da Sagogn prendì part ad in'acziun spectaculara per il medem motiv: Lura aveva in helicopter grond dal tip Kamov sgulà ina punt da 25 meters ed ina paisa da 3'800 kilos en la Val Mulin e tschentà quella sin ils fundaments semtgads. La populaziun, pressa, televisiun e radio avevan observà davent da Bregl, a l'ur sur da la chavorgia, co il grond helicopter aveva auzà sin il plaz d'installaziun a Val Casti la construcziun d'atschal e transportà quella radund 400 meters viaden en la val. Là avevan sis umens piglià las sugas e stuschà la punt en posiziun.
Impurtanta per il turissem
Ussa, 25 onns pli tard, ha l'erosiun mangià davent in bun toc da las spundas da la Val Mulin ed igl è necessari da remplazzar la punt d'atschal construida en in toc. L'implant nov è ina punt da sugas pli leva, quai che garantescha ina vita pli lunga. La punt è d'impurtanza per il turissem, numerus ciclists e viandants sa movan tranter Laax, la Ruinaulta e la staziun Valendas-Sagogn da la Viafier retica.
La radunanza communala da Sagogn ha concedì l'atun passà in credit da 325'000 francs per la punt nova. L'impurtanza da la punt en la Val Mulin cumprovan las reacziuns che la vischnanca ha gì gl'enviern passà da la populaziun. Suenter ch'ella ha publitgà in appel da gidar cun la finanziaziun, ha ella survegnì numerusas donaziuns d'indigens ed osps da vacanzas. Il suprastant responsabel Daniel Tuggener ha confermà a la FMR che la rimnada haja purtà in retgav da bun 50'000 francs.
Nagina garanzia perpetna
L'inschignier responsabel Christian Loretz, il con-iniziant da la punt Pendenta a Mustér, ha confermà a la FMR ch'ins vegn a construir ussa ils fundaments ed ils sochels per la punt nova. La construcziun veglia d'atschal vegn allontanada enturn mez avust. Previsiblamain puspè cun ina massa aspectaturs che vegnan ad observar co l'object vegn allontanà.
Ina garanzia perpetna per la punt da sugas nova na pon ni vischnaunca ni inschigniers dar. Era quella è exposta a las forzas da la natira. Perquai che la Val Mulin – ina chavorgia laterala da la Ruinaulta – erodescha cuntinuadamain. Igl è il material luc da la bova da Flem ch'è ì a val avant 10'000 onns. Dapi lura è la Val Mulin mai sa fermada. La punt da sugas nova garantescha dentant da traversar ils proxims decennis segiramain l'impressiunanta chavorgia.