Il facit da Katrin Blumberg è suenter in onn presidi communal bun. La nova suprastanza haja gì da tractar blers dossiers vegls, la lavur na giaja betg ora, manegia la presidenta da Sagogn. Tar ina da quellas grondas lavurs tutga la via da colliaziun da Sagogn vers Laax ch'è dapi onns in tema permanent. Là dettia ussa ina schliaziun definitiva, uschia ch'il project giaja vinavant.
Tar l'auter grond project, la revisiun totala da la planisaziun communala, dettia anc ina protesta che retardeschia il process.
Nus avain survegnì bler feedback positiv davart nossa communicaziun e noss discurs.
La glieud da Sagogn para d’esser cuntenta cun ses timun: Ina enquista tar la populaziun haja mussà quai. Il pievel laudia la communicaziun e la disponibladad da la suprastanza, uschia la presidenta communala.
Dus suprastants van suenter in onn
La vischnanca da Sagogn è dentant puspè a la tschertga da dus novs commembers per suprastanza. Hannes Furger, il responsabel dal departament de bajegiar sco era Martin Hunger, il responsabel per l'agricultura e las alps, termineschan suenter mo in onn en uffizi.
Furger fa quai ord motivs persunals, Hunger pervi da la sanadad. Ils ultims onns èn las elecziuns savens stadas spontanas, senza candidatas u candidats annunziads ordavant. La presidenta spera che quest sistem funcziunia era quella giada. Tar l'emprima schanza – tar la radunanza communala dals 20-06-2025 – n'ha dentant nagin mussà interess da candidar. Ils sezs restan pia vacants.
La tschertga va vinavant
Suenter la radunanza communala ha la presidenta communala Katrin Blumberg ditg a la FMR ch'ella veglia eruir ils motivs per la mancanza d'interess. Sch'ins sappia tge che saja il problem, saja era pussaivel da chattar ina fia da chattar candidatas e candidats. Ils 23 d'october vegn la proxima radunanza communala puspè a tractar la tschertga da duas persunas per la suprastanza. Il proxim temp vegnia in gremi da trais persunas a manar la vischnanca. Uschia vegnia dentant ad esser grev da realisar tut las fatschentas tenor plan.