Duas vias mainan en il vitg da Sagogn – numnadamain quella che vegn nà da Schluein e quella che vegn giu da Laax. La via nà da Schluein è sanada, quella giu da Laax stuess anc vegnir sanada. Ma perquai che questa via sa chatta en ina zona da protecziun da l'aua da funtauna, n'èsi betg pussibel da simplamain sanar quella.
Pliras variantas
Dapi onns è l'uffizi da construcziun bassa pia vi d'evaluar variantas per in nov trassé. La varianta ch'il chantun aveva favorisà, fiss ida sur il vitg ora tar in lieu cun il num «Plaun Pigniel». Quai è in lieu popular cun plazza da gieu e fuaina. Ma cunter quella varianta avevi dà avant tschintg onns ina petiziun cun 1'406 suttascripziuns da la glieud da Sagogn –inclusiv d'ina proposta per in'autra varianta.
Tar la radunanza communala da Sagogn mez zercladur 2024 ha la suprastanza suttamess quatter variantas al suveran per ina votaziun consultativa. La radunanza communala ha votà unanimamain per la varianta «Fletg_1». Il nov trassé na faschess tenor questa proposta betg donn al «Plaun Pigniel» e giess sut la zona da protecziun cunter aua. La sortida existenta en la via chantunala restass.
I va mo fitg plaun vinavant
Suenter questa votaziun consultativa ha ina gruppa accumpagnanta elavurà la varianta «Fletg_1». Uss è la balla puspè tar il chantun, raquinta Katrin Blumberg, presidenta communala da la vischnanca da Sagogn. Il proxim pass è d'adattar il plan directiv, là saja il chantun il mument vidlonder.
Atgnamain era l'idea ch'ils documents sajan pronts fin l'emprim quartal dal 2026. Ma nus avain gia uss retard per quest emprim pass. Ils documents n'èn gnanc anc finids.
Il project haja gia uss retard – e sa chattia pir al cumenzament d'in immens process lung e cumplitgà. Fin che l'emprim exchavatur cumenza cun las lavurs giaja quai segir anc fin l'onn 2031. Tenor Katrin Blumberg saja quai plitost quintà optimistic, damai ch'i dettia ina pluna obstachels durant l'entir process che pudessan retardar il project.
La situaziun chaschuna frustraziun
La suprastanza communala na possia actualmain far nagut auter che spluntar regularmain tar il chantun ed uschia empruvar da far squitsch d'accelerar il process. Ad els sajan liads ils mauns. Insatge che na vegnia betg adina chapì da la populaziun da Sagogn, di la presidenta communala. I dettia adina puspè abitants che dian ch'els duain interprender insatge e ch'i stoppia finalmain ina giada ir insatge enavant.
Nus essan era da l'avis ch'i duai ir enavant, ma nus na pudain il mument propi far nagut per accelerar il process. Quai na procura betg mo tar la suprastanza, mabain cun raschun er tar la populaziun per frustraziun.
Spetgar e mantegnair
Per la vischnanca da Sagogn munta quai pia: spetgar, avair pazienza e vinavant finanziar il mantegniment da la via. En la radunanza communala dal zercladur ha il suveran approvà in credit da 70'000 francs. Cun quai duai il pli necessari vegnir sanà. Per ils proxims onns quinta Katrin Blumberg cun investiziuns annualas da circa 10'000 francs.