In invista sin il plazzal duas emnas suenter il chat
In'equipa da sis persunas lavurà en la Via Casut a Sagogn. A susta da dus pavigliuns alvs examineschan las archeologas ed ils archeologs la terra sin il plazzal. Il mument èn ellas vi da liberar plirs skelets da la terra: En schanuglias, cun fistets, portan ellas bufatg davent il terratsch da l'ossa. Quai per betg donnegiar l'ossa e per betg muventar la posiziun dal skelet. Sper l'ossa umana han ils archeologs er chattà tocca da lain dals vaschès. Objects agiuntads a la fossa n'han els betg chattà.
Il Servetsch archeologic documentescha la plazza d'exchavaziun. Ils archeologs han scuvert passa 20 fossas. Ils indizis laschan supponer ch'i sa tracta d'in santeri dal temp medieval, cunquai che las bleras fossa èn orientadas encunter la damaun: Il chau è en il vest ed ils pes guardan envers ost, tge che saja tipic per la cristianisaziun, di Marina Casaulta ch'è ina da las archeologas sin il plaz.
En il sectur vest da la plazza d'exchavaziun ha l'equipa gia documentà plirs skelets e gia allontanà ils chats. Quels van vinavant da Cuira a Basilea tar ina antropologa ch'examinescha l'ossa. Lezza sappia suenter intercurir l'ossa dir dapli tar la vegliadetgna, la schlattaina ed il stadi da sanadad da las persunas en il mument da la mort. Plinavant examinescha in labor provas d'ossa cun la metoda dal carbon. Cun quella san ins datar l'ossa cun ina exactadad da var 50 onns.
La tschertga va vinavant. Sin ina sdrima d'ina lunghezza da radund 15 meters van las archeologas ed ils archeologs sectur tar sectur vinavant. Segir è gia ch'in skelet sa chatta in pèr meters plinenvi. Ed insacura è il santeri a fin.
