La «casa da scola nova», sco il bajetg da scola construì 1980 vegn numnà a Mustér, basegna ina sanaziun. Da quai èn las autoritads persvadidas dapi onns. Las enconuschientschas fatgas ussa cun in studi davart il potenzial da l'entir areal da scola, sco era in concept co proceder en quai connex mussan en tge direcziun ch'il project pudess ir.
Glindesdi, ils 23 da mars 2026 vegn il cussegl da vischnanca orientà davart il project. Il medem mument dumonda la suprastanza communala il parlament per in credit da 380'000 francs per arranschar ina concurrenza da project cun la finamira da construir in nov bajetg per la scola populara a Cons. El duai remplazzar la chasa da scola erigida 1980.
Ina nova casa da scola
Tenor quellas emprimas ponderaziuns duess la «casa da scola nova» là vegnir spazzada. Sch'i va tenor la veglia da la suprastanza communala duess quella fasa da planisaziun esser a fin uschè spert sco pussaivel, per ch'il suveran avess da decider l'emprim quartal 2028 davart il credit da bajegiar. Las lavurs da construcziun pudessan cumenzar il pli baud l'onn 2029. Tenor emprimas enconuschientschas duessan ils custs per il bajetg nov ed per spazzar la chasa da scola bajegiada 1980 sa mover tranter 12 e 15 milliuns francs. Ina segunda etappa pudess la sanaziun da la chasa da scola veglia esser. Per quella vegn calculà il mument cun custs da 4 milliuns francs.
Analisà l'areal
Per pudair giuditgar co agir futuramain cun ils bajetgs, respectivamain cun ils basegns da la scola populara sin l'areal a Cons, ha la suprastanza communala laschà elavurar in studi. Quel è vegnì exequì dal biro d'architectura Tambornino. «Quai studi dat a nus ina buna basa e sin fundament da quel avain nus laschà elavurar in concept co proceder. Quel è vegnì fatg dal biro Stauffer & Staudach SA. Quai biro ha cusseglià nus gia en la strategia pertutgant il Center Fontauna», di il mainafatschenta da la vischnanca da Mustér, Roland Cajacob.
Il studi che circumscriva plirs projects parzials sin l'areal a Cons vegn a la conclusiun che la chasa da scola veglia, construida 1952, ha ina buna substanza e po vegnir duvrada vinavant en questa furma. Perencunter sa preschenta in auter maletg tar la chasa da scola bajegiada 1980. «La sanaziun da quella vegn ad esser cumplitgada e chara. Plinavant èsi fitg grev da planisar ina sanaziun, damai ch'igl è grev d'eruir tge che spetga en las differentas localitads e davos las paraids», scriva la suprastanza communala en il messadi per mauns dal cussegl da vischnanca. In problem pudess per exempel la materia d'asbest esser.
Sanaziun fitg chara
La suprastanza communala constatescha ch'ils custs per ina sanaziun da la «casa da scola nova» fissan pli auts che da construir in bajetg nov. «La sanaziun sco tala è dentant mo ina chaussa. Il medem mument avain nus l'obligaziun da procurar per in'infrastructura adattada era per persunas cun handicap. Plinavant vegnin nus confruntads cun las pretensiuns pertutgant in cas da terratrembel», di Roland Cajacob.
Lura avess in bajetg nov l'avantatg che las localitads da la chasa da scola pudessan vegnir duvradas enfin che il bajetg nov fiss realisà. «Uschia na stuessan nus betg procurar per in provisori», punctuescha Roland Cajacob. Nua exact ch'il bajetg nov duess vegnir erigì sin plaz scola a Cons vegn surdà a la fantasia dal planisader che gudogna la concurrenza da project.
Concept cumplessiv
Il studi che la vischnanca ha laschà elavurar davart l'areal da scola a Cons na sa concentrescha betg be sin ils basegns da la scola populara. En quel vegnan ina fulla opziuns, variantas e pussaivladads tematisadas. El cuntegn era ulteriurs aspects sco per exempel il spazi per la canorta d'uffants, la biblioteca, la ludoteca ed in café u mensa. In'ulteriura opziun, probablamain pauc realistica, fiss ina garascha sutterrana sin l'areal. Sin fundament dal studi e dal concept constatescha la suprastanza communala: «L'areal da scola ha il potenzial da daventar in lieu da sentupada unic.»
Definir ils criteris
Duess il cussegl da vischnanca conceder il credit da planisaziun vegnissan ils criteris per la concurrenza da project fixads immediat. «La basa per la concurrenza da project cuntegn surtut il perimeter pussaivel per ina surbajegiada, il program da localitads, il rom da custs e las cundiziuns da rom», scriva la suprastanza communala. Il program da localitads vegniss elavurà d'ina gruppa da lavur che duess consister da represchentants da la scola e da la vischnanca.