La scola Sagogn ha ensemen cun l'Uniun da dunnas e l'Uniun da teater dal vitg envidà gievgia ad ina festa per finir l'onn da scola. Quai cun in vast program: Il suentermezdi cun in'exposiziun ed in concert da Mattiu Defuns e la saira cun producziuns musicalas da la scola e scoletta. Sper in teater cun uffants ha la chantautura da Sagogn Anik dà in concert la saira. La fin da l'onn da scola vegn spetgà da las scolaras e dals scolars cun legria. Il medem mument fan els patratgs co ch'i va vinavant suenter las vacanzas.
La scola da Sagogn ha prendì la chaschun da far ina festa in pau pli gronda quest onn. Per l'ina perquai che la finiziun da l'onn da scola n'ha betg pudì vegnir celebrada ils davos onns, Per l'autra perquai ch'i dat il proxim onn da scola midadas pervia da la fusiun cun Schluein. La 5 e 6avla classa vegnan ad ir a partir da l'avust a Schluein a scola. Mintga midada sa esser greva, era per las scolastas. Per las scolastas da l’emprima e segunda classa, Patricia Arpagaus e Claudia Eix, n'èsi betg simpel da prender cumià da lurs scolars.
Per ils blers e las bleras è la finiziun da scola in cumià che fa il medem mument endament ina nova entschatta. La dumonda: «Co vegn il proxim onn da scola a vesair ora?», è omnipreschenta. La scola ha er fatg in curt film cun ils uffants da la scoletta ed ils scolars e las scolaras da la 6avla classa. Els han pudì s’exprimer davart tge che spetga els l’auter onn cura ch'i dat ina gronda midada. Las vacanzas da stad dastgan dentant vegnir avant.
