Siglir tar il cuntegn

Header

cuntegn

Sedrun-Mustér Turissem Silvio Schmid elegì sco nov president

L’uniun turistica ha elegì Silvio Schmid sco nov president. Quai senza gronda discussiun e cuntraproposta. L’elecziun è stada clera cun 53 da las 56 vuschs valaivlas. Medemamain en suprastanza è vegnì elegì Nando Calore il CEO dal ressort Catrina a Mustér. El remplazza l’anteriura presidenta Corinne Staub ch’aveva abditgà l’entschatta da matg. Uschia è la suprastanza puspè cumpletta.

Collavuraziun cun tgi?

Sco il nov elegì president Silvio Schmid ha menziunà en ses pled, saja necessari da uss unir las forzas era en il marketing. Uschia saja la collavuraziun cun Andermatt-Sedrun-Disentis marketing ina consequenza logica. L’onn passà hajan las duas pendicularas investì en questa societad 1 milliun francs e cun unir tut las forzas possia anc vegnir fatg dapli, ha menziunà Silvio Schmid. Dentant la collavuraziun cun Grischun Vacanzas saja stada ina buna e la lavur prestada era, ma cura ch’ins possia mantegnair ils daners en la regiun e generar plazzas da lavur, sco era dapli pernottaziuns alura saja cler ch’ì saja necessari d’agir en favur da la chaussa, ha ditg Schmid. Ma la decisiun na saja anc betg crudada ed era la disditga dals contracts cun Grischun Vacanzas na saja anc betg inoltrada.

Sperdita ma tuttina optimistics

L’uniun ha l’onn passà generà ina sperdita da radund 85’000 francs. Quai saja dentant surtut d’attribuir a la collavuraziun pli stretga cun la viafier Matterhorn Gotthard, nua ch’ins haja gia stuì pajar l’entira cumpart. Er expensas extraordinarias per marketing, sco per exempel la realisaziun dal film da Gian e Giachen al Lai Tuma, hajan contribuì al deficit, ha declerà la directura Simona Barmettler.

RR novitads 06:00

Artitgels legids il pli savens