Il Spital Regiunal da Glion è actualmain cunfruntà cun pliras decisiuns impurtantas en connex cun la dumonda: co vinavant en l'avegnir? Pervi da las stretgas finanzialas è l'ospital tranter auter sfurzà da ponderar tge prestaziuns ch'el vegn anc d'offrir en l'avegnir.
Cun questas decisiuns e sfidas è confruntà Markus Fisch, il nov directur dal Spital Regiunal a Glion ch'ha cumenzà ses post l’entschatta december 2025. Suenter 100 dis en uffizi tira el ina bilantscha positiva davart sia lavur. El haja cumenzà bain, gia pudì emprender ina massa ed era manà blers discurs. Quels hajan mussà che l'ospital haja blers collavuraturs e collavuraturas engaschadas.
Jau poss constatar che nus avain in manaschi fitg bun, cun persunal motivà che s’identifitgescha cun l'ospital, l’organisaziun e la regiun.
Tuttina dettia actualmain plirs temas che fatschentian il Spital Regiunal a Glion: per exempel la mancanza da persunal, la situaziun finanziala ed era la digitalisaziun, declera Markus Fisch.
Ma era duas sfidas politicas stettian davant porta. Per l'ina stoppia la Sana Surselva decider, tge prestaziuns che l'ospital vul anc porscher en l'avegnir e per l'autra spetgia era l'integraziun da l'ospital en la rait da la Sanadad Surselva. Quella duai cumenzar ses manaschi operativ a partir dal 2027.
Fact è che la politica prescriva las premissas. Nus faschain il meglier pussaivel ordlonder ed empruvain da segirar il provediment medicinal per la regiun.
Malgrà tutta motivaziun dals collavuraturs e las collavuraturas preoccupian questas decisiuns politicas er il persunal, constatescha Markus Fisch. Uschia di el che las discussiuns procuran per part per malsegirtads e temas. I saja dentant impurtant da restar focussads e da lavurar era vinavant bain.