La Sanasurselva ponderescha da serrar la partiziun da naschientschas en l'ospital regiunal da la Surselva a partir dal 2027. Questa decisiun dependa dal fatg sch'i dat in segund medi d'uffants en la regiun suenter il 2027.
Actualmain datti dus medis d'uffants, in da quels va la fin dal 2026 en pensiun.
Provediment medicinal d'uffants en privel
La Sanasurselva tema ch'il provediment medicinal dals uffants naschids en l'ospital a Glion na saja betg garantì avunda a partir dal 2027, perquai che la successiun per il medi che va en pensiun n'è anc betg reglada. La media d'uffants Nathalie Casutt è dentant da l'avis ch'ella pudess far il servetsch era suletta.
L'onn passà ha l'ospital a Glion gì 130 naschientschas. Da quellas datti tenor la media d'uffants en ca. 10% dals cas ina cumplicaziun nua ch'in medi d'uffants sto intervegnir urgentamain. René Epp, president da la Sanasurselva, è da l'avis ch'i dovria dapli che in medi per segirar il servetsch.
Er il Grischun Central ha tractà la dumonda da serrar
Effects sin las dunnas en speranza
Nathalie Casutt exprima quitads davart il temp da viadi pli lung per las dunnas en speranza, sch'i dess en l'avegnir betg ina partiziun da naschientschas a Glion. René Epp vesa quella situaziun però main dramatica e na crai betg che la serrada da la partiziun da naschientschas fiss ina risc per las dunnas Sursivanas che han da parturir.
Ni la Sanasurselva ni ils medis d'uffants han fin ussa chattà ina alternativa clera. Omaduas partidas èn dentant actualmain vidlonder da tschertgar soluziuns per l'avegnir.