Dapi radund in onn porscha l'Ospital regiunal Surselva servetschs en la chirurgia plastica, ma quella purschida stritga l'ospital puspè, cunquai che las uras da consultaziun n'èn betg occupadas avunda bain. I na giascha betg vi da la qualitad ni vi da l'organisaziun cun l'Ospital chantunal dal Grischun. La purschida sa basa sin ina collavuraziun cun l'ospital chantunal che n'ha betg avunda capacitads. Gugent avess ins per exempel opera tumors da la pel en fatscha ni offrì operaziun dal pèz. Quai entras in medi spezialisà dal ospital chantunal. Ils dus ospitals avevan quintà cun clientella da la Surselva sco era da las regiuns dal Plaun e Cuera. Ma la purschida n'ha sin il davos betg attira avunda glieud.
I sto esser frequentà bain, uschiglio na renda quai betg.
En duas autras spartas medicinalas funcziunia la collavuraziun tranter ils dus ospitals, numnadamain en l'oncologia e l'urologia. Las uras da consultaziun dals dus medis externs èn frequentadas fitg bain, uschia ch'ellas n'èn betg dispitaivlas ord vesta medicinala sco era finanziala.
Nus na savessan gnanc ans prestar in oncolog si qua ed era questa savida dal fatg che l'Ospital chantunal ha, na fiss betg pussaivel d'avair senza ina collavuraziun.
Quai èn pia autras premissas che tar quellas partiziuns, nua ch'il spital ha cunvegnas da prestaziuns cun las vischnancas, sco per exempel en la neonatologia. L'ospital sto porscher quai servetsch, in eventual deficit porta la publicitad.
Prestaziuns supplementaras che marschan bain, gidan finanziar l'ospital ch'è sco ils blers ospitals regiunals en il Grischun en las stretgas finanzials. Tut tschellas prestaziuns supplementaras na vegn il spital betg da tegnair ditg, sco l'exempel da la chirurgia plastica demussa, perquai che la dumonda dictescha la purschida.
