Dapi radund quatter onns vegn il servetsch d’ambulanza 144 manà dal tut da l'ospital regiunal Surselva. Il contract cun ina interpresa privata a Mustér era vegnì schlià. La consequenza era quella che la basa a Mustér era occupada 24 uras durant la stagiun auta e durant il di en la stagiun bassa.
Per survegnir agid en in cas d’urgenza era perquai durant la notg vegnì introducì l’agid urgent cun ina equipa da pumpiers spezialisada en collavuraziun cun ils medis da chasa. Era vegn clamà u direct il servetsch da salvament Rega u ina ambulanza si da Glion.
En il contract da prestaziun chantunala è ina da las premissas ch’ina ambulanza ha da cuntanscher en 90% en in quart d’ura il cas urgent. Quai ademplescha l’ospital a Glion il mument en radund la mesadad dals cas, sch’ins quintia in quart d’ura dapli alura en radund 90% dals cas urgents, declera Patrick Braun, responsabel per il servetsch 144 e schefmedi d’anestesia a l’ospital regiunal Surselva.
Ma tut quels ch’enconuschian las vias sursilvanas sappian che quai na saja strusch pussaivel da far e ton pli pretendia gist la situaziun topografica in augment da basas d’ambulanza occupadas l’entir onn e da tut temp en Surselva, declera Braun.
Il chantun ha acceptà il concept
Per il directur da l’ospital regiunal Surselva Fadri Bisatz èsi betg propi cler daco che la premissa d’esser en in quart d’ura al lieu è insumma en la cunvegna da prestaziun chantunala. Impurtant saja ch’il chantun haja acceptà il concept inoltrà ed haja era augmentà per dapli che 5 milliuns francs las contribuziuns per il servetsch d’urgenza als ospitals responsabels.
Uss vali quai da reparter ils daners ed alura era da pudair occupar las plazzas vacantas, accentuescha Bisatz. E quai è la gronda sfida, la mancanza da persunal qualifitgà en la branscha en l’entira Svizra, di era Patrick Braun. Perquai scoleschian els era intensiv persunal indigen, per chattar persunal collià per l’ina cun la regiun e motivà da lavurar en Surselva.
In dischavantatg na saja il lieu Glion ni la Surselva betg, ma era betg in avantatg. Il mument hajan els scrit ora pliras plazzas per il servetsch d’urgenza, ma la resonanza saja magra, uschia Braun. Per manar ina basa d’ambulanza basegna quai tenor il schefmedi d’anestesia circa 11 persunas en plazza cumplaina.
Introducir tut quest onn
Ils daners per realisar las duas basas d’ambulanzas permanent en Surselva èn avant maun, sche la tschertga da persunal ha success alura vegnan ins anc quest onn ad etablir las duas basas permanent, declera il directur dal ospital Fadri Bisatz.
