L’entschatta settember ha Fadri Bisatz surpiglià il post da directur en l'Ospital regiunal da la Surselva. El è daventà successur da Claudia Käch ch'è ida anticipadamain en pensiun.
Lavur pretensiusa
Ch'il sectur da sanadad è sut squitsch ha il nov directur da l'ospital a Glion sentì spert. Il squitsch da finanzas e la mancanza da persunal è ina sfida permanenta. Ina emprima decisiun malempernaivla è vegnida communitgada il december cura che la partiziun da naschientscha ha stuì vegnir serrada suenter Nadal per quatter dis.
Nus avain gì la disditga da la plazza da quatter spendreras sin la fin da l'onn. Cun la cumpensaziun da dis libers avevan nus memia pauc persunal per quests dis. Ussa è la situaziun sa normalisada.
La situaziun dal persunal è tendida. Era sch'i dat il mument in stop d'engaschar nov persunal tschertga l'Ospital regiunal da la Surselva actual 18 persunas en differentas spartas.
I manca vairamain persunal. Ina part da las plazzas publitgadas èn dentant per augmentar il dumber da persunal tar il servetsch d’ambulanza. Da principi guardain nus che nus possian mantegnair la qualitad.
Las finanzas smatgan
L'onn 2022 ha l'ospital scrit in deficit da 1,4 milliuns francs. Era per ils proxims onns quintan ils responsabels cun deficits en la dimensiun da mintgamai passa 2,5 milliuns francs. Per Fadri Bisatz ha quai da far cun il sistem da finanziaziun.
Cun las tariffas d’indemnisaziun mumentanas n’èsi tenor mai betg pussaivel da curclar ils custs. Quai è ina dumonda politica. Nus duvrain pli autas taxas da cumpensaziun per che nus possian porscher las prestaziuns uschia che quellas cuvrissan ils custs.
Sco il cusseglier guvernativ Peter Payer ha ditg envers RTR èsi chaussa dals ospitals e da las cassas da malsauns da contrahar las indemnisaziuns per las prestaziuns. Sche quai n‘è betg pussaivel sto il chantun fixar las tariffas.
Nus avain proponì d’auzar las tariffas per ils servetschs ambulants da 83 sin 90 raps per punct. Las cassas da malsauns han fatg recurs cunter questa decisiun ed uschia è il cas ussa tar il Tribunal administrativ federal.
Fin tar quella decisiun restan las tariffas sin il stan mumentan.
Tge prestaziuns sto l'ospital porscher
L'Ospital regiunal da la Surselva porscha las prestaziuns ch’il chantun Grischun e la Sanasurselva sco represchentanta da las vischnancas purtadras pretendan. Sche l'ospital stuess lavurar senza deficit, lura stuess el stritgar prestaziuns.
Ils custs dependan da las prestaziuns che la Sanasurselva vul. Nus survegnin gia contribuziuns da las vischnancas per servetschs sur obligatorics, sco la pediatria, la ginecologia u la partiziun da naschientscha. Quels na tanschan dentant er betg per curclar ils custs
La dumonda è: Tge vul la populaziun e tge è la populaziun pronta da pajar per quai?
Fadri Bisatz ha dà paisa al fatg che tut ils ospitals regiunals en il chantun hajan da cumbatter per las finanzas. El è persvas ch’il persunal presta ina fitg buna lavur, e che l'ospital ha uschia e cun il sustegn da la regiun bunas premissas per l'avegnir.
Servetsch d’ambulanza en la critica
Dapi il matg 2020 organisescha l'Ospital regiunal il servetsch d’ambulanza staziunà a Mustér. Avant procurava la firma Furger Taxi ils transports davent da sisum la Surselva. Dapi la midada è l'ospital adina puspè confruntà cun la critica ch’il servetsch d’ambulanza saja manglus.
Il servetsch d’ambulanza a Mustér avain nus surpiglià supplementarmain. Dal chantun ch’è responsabel per las prestaziuns d’economia collectiva per il servetsch d’ambulanza survegnin nus tuttina blers daners sco cura che nus avevan sulet il post d’ambulanza a Glion.
90% dals custs per il servetsch d’ambulanza surpiglia il chantun. Las contribuziuns èn vegnidas auzadas l'onn passà dal Cussegl Grond.
Il Cussegl grond ha augmentà las contribuziuns dal chantun da 8 sin 13 milliuns francs. Cun quest augment duai esser pussaivel als ospitals da cuvrir ils custs sch’els collavuran bain cun ils medis da chasa.
