Tut las stentas per augmentar la svieuta da la stizun da Rabius n’hajan betg purtà il resultat giavischà, uschia la suprastanza da l'Associaziun da consum Rabius/Surrein. Quest pass da serrar la stizun da Rabius saja necessari per evitar il concurs da l’Associaziun.
La stizun a Surrein percunter resta averta. A media vista èsi planisà da transfurmar quella en ina stizun che ha avert durant 24 uras al di e 7 dis l’emna per pudair spargnar custs da persunal.
Avant questa decisiun aveva ina gruppa da lavur tramess en tut las chasadas da Surrein e Rabius, sco era als possessurs da segundas abitaziuns ed a las interpresas in questiunari cun dumondas davart l’avegnir da la stizun da Rabius. Per gronda part è sa mussà che la purschida è buna e surtut ils products indigens sajan tschertgads. Las cifras mussan però in auter maletg.
