La figlia dad Adelina Schnoz e dunna da Mario Columberg, Anna Maria Columberg, è sezza malsauna e na po perquai betg tgirar sia mamma tut il di. Ella gidia dentant cun diversas chaussas, per exempel il tagliar las unglas. Mario Columberg e sia dunna surpiglian per l’ina la tgira a chasa ord amur e da l’autra vart per accumplir il giavisch dad Adelina Schnoz da pudair star vinavant en sia chasa paterna e betg ir en ina chasa d’attempads.
Jau hai bel qua e na giavisch betg auter. Els guardan bain da mai.
Era la Spitex na saja actualmain nagin’opziun cunquai ch'i vegniss mintga di in’autra persuna – quai pudess irritar. E Mario Columberg di, ch’el fetschia gugent questa lavur da tgira, el haja gugent da far insatge. Sper la tgira guarda el era dal curtin e fa laina per stgaudar.
-
Bild 1 von 3. Mario Columberg mida dus giadas a di las bandaschas da las chommas dad Adelina Schnoz. Bildquelle: RTR.
-
Bild 2 von 3. Mintga di cuschina Mario Columberg per sia sira. Questa giada hai dà tartuffels, giabus cotschen ed ina liongia da sang. Bildquelle: RTR.
-
Bild 3 von 3. Tranteren fetschia el ora laina. Cun quella laina stgauda Mario Columberg lura la chasa e fa fieu per cuschinar. Bildquelle: RTR.
In’autra realitad
Mario Columberg e sia sira passentan bler temp ensemen – circa otg uras a di. Durant che Mario Columberg tgira las plajas u cuschina sa pusa Adleina Schnoz enavos cunter sia pultruna. Dapi trais onns tgira Mario Columberg sia sira intensivamain. Quai saja ina tut autra realitad che pli baud: El ha lavurà sco miradur e pulì las vias per il chantun. Bunamain 50 onns saja quai stà sia occupaziun.
Ussa, cun la nova incumbensa da tgirar, haja el emprendì da cuschinar. Mintga di fetschia el in menu – questa giada hai dà tartuffels, giabus cotschen ed ina liongia da sang.
Sustegn e bainvegnì
La famiglia Columberg viva da lur rentas. Per els fissan quests 300 enfin 600 francs a mais in bun sustegn. Mario Columberg manegia che blers dian che questa summa na saja betg bler. Ma per el e sia famiglia fiss quai bun, era sch'els na fan questa tgira betg per ils raps.
Er Adelina Schnoz è da l’opiniun che quest sustegn finanzial dal chantun è giustifitgà. Ella di ch’ins pajass bler dapli sch'ina persuna externa faschess la tgira. Perquai chatta ella quai gist, sch'era persunas dal conturn che tgiran confamigliars survegnan raps.