Avant in onn era la suprastanza da Sagogn anc cumpletta cun tschintg persunas. Entschatta da la stad 2025 han dus dad els dà si lur posts, quai ord motivs persunals sco era ord motivs da sanadad. La suprastanza era uschia anc en trais. Avant circa 10 dis ha lura Alexander Ernst demissiunà per immediat uschia che la suprastanza da Sagogn aveva mo pli dus suprastants – e cunquai n'è ella betg pli abla d’agir e da trair decisiuns.
Sin quai ha il chantun mess a disposiziun in cumissari che duess sustegnair la suprastanza enfin che quella è puspè cumpletta. Quai cumissari è Duri Blumenthal, anteriur president communal da la Lumnezia ed anteriur mainafatschent da la Regiun Surselva. In cler favurit, declera Thomas Kollegger, manader da l'Uffizi chantunal da vischnancas.
Duri Blumenthal correspunda fitg bain al profil che nus avain definì.
Da chattar ina persuna adattada per quest post, quai na saja betg uschè simpel, tradescha Thomas Kollegger. Quella persuna sto avair experientscha co manar ina vischnanca, il meglier ina persuna ch’è gias stada en ina suprastanza – en il meglier cas schizunt ina anteriura presidenta u in anteriur president. Vinavant èsi impurtant che quella persuna enconuscha la glieud e la regiun ed ella na duai avair naginas dispitas.
Cura è il mandat da Duri Blumenthal a fin?
L’incumbensa da Duri Blumenthal sco cumissari è partì en duas fasas. En l’emprima fasa funcziuna il cumissari sco in commember regular da la suprastanza. El dastga sa participar a sesidas e dar sia vusch. Ina ferma vusch, declera Thomas Kollegger.
Il cumissari ha las vuschs ch’èn necessarias per decider.
Quai munta: sch'els èn en dus lura ha il cumissari ina vusch. Sche ina da quellas duas persunas è absenta lura ha el duas vuschs. La garanzia per decider è dada. Quai vala fin a las elecziuns substitutivas ch'èn ils 23 d’october.
Sche la suprastanza da Sagogn chatta trais persunas adattadas per ils sezs vacants – lura va il mandat da Duri Blumenthal a fin. Sche quai n'avess betg dad esser il cas e la suprastanza vegn be d’occupar in u dus sezs, lura entschaiva la segunda fasa: La vischnanca saja lura puspè abla d’agir – dentant resta il cumissari vinavant en suprastanza en ina furma da cussegliader. E quai vala enfin che la suprastanza è puspè cumpletta. Il cumissari po era gidar a chattar glieud adattada per ils posts vacants.
Collavuraziun: Tgi fa tge?
La presidenta da la vischnanca da Sagogn, Katrin Blumberg, è fitg cuntenta ch’il chantun haja chattà questa soluziun.
Ussa essan nus puspè en trais e pudain uschia puspè decider.
Duri Blumenthal vegn a sustegnair la vischnanca enfin che la suprastanza è puspè cumpletta. En il meglier cas enfin a la radunanza substitutiva dals 23 d’october. Bler temp per midar il mund na resta betg al cumissari. Tenor Katrin Blumberg na fa quai ussa betg senn da reparter ils departaments che n'èn betg occupads sin els trais.
Duri Blumenthal na vegn betg a surpigliar entirs departaments, quai na fa betg senn per quest curt temp.
Il focus da Duri Blumenthal vegn cunzunt ad esser da sustegnair la suprastanza da chattar novs candidats u novas candidatas. Sper quai marscha il trot da mintgadi vinavant: saja quai cun sanaziuns da vias ubain la revisiun da la planisaziun locala. Ch'i gartegia era da chattar nova glieud per la suprastanza, da quai è Katrin Blumberg da buna speranza.
Nus faschain in'infurmaziun nua che nus preschentain la lavur da suprastanza, uschia che la glieud sa metter avant insatge. Vinavant vegni er a dar ina saira d’infurmaziun nua che la populaziun ed interessents pon tschentar lur dumondas.
Nua èn ils indigens che vulan s’engaschar?
Malgrà che la vischnanca da Sagogn stat finanzialmain bain, ha ella fadia da chattar glieud che vul s’engaschar en la suprastanza – cunzunt er indigens. Daco che quai saja uschia haja plirs motivs, declera Katrin Blumberg. Sagogn saja ina pitschna vischnanca ed ils blers sajan gia stads engaschads en in u l’auter uffizi.
Ils blers han gia fatg lur duairs per la vischnanca.
Vinavant vegnia ch’en la societad dad oz na vul nagin propi prender temp per da quels posts e s’engaschar, di la presidenta vinavant. Sagogn na saja per bler betg la suletta vischnanca ch'haja fadia da chattar glieud. Sin la dumonda sch'ella, sco presidenta, avessi in giavisch tgi che duess surpigliar quels posts manegia ella: Na, il pli impurtant saja che quellas persunas sajan motivadas, ch’ellas portian atgnas ideas e collavurian constructivamain.