La vischnanca da Sagogn ha be pli dus suprastants communals – Alexander Ernst ha demissiunà ils 27 d'avust per immediat, ha scrit la FMR che sa referescha sin infurmaziuns da la chanzlia communala. Alexander Ernst è stà be circa in onn en uffizi.
Damai ch'igl ha memia pauca glieud en la suprastanza communala da Sagogn survegn ella sustegn dal chantun. Quai ha la regenza chantunala communitgà ils 04-09-2025.
La regenza ha nominà a Duri Blumenthal, l'anteriur president communal da la Lumnezia, sco cumissari da la regenza. El dastga far part a las sesidas da la suprastanza e po dar las vuschs ch'i manca. El n'è betg lià vid la suprastanza o po decider libramain. Ses mandat termineschia uschè spert che la suprastanza saja puspè cumpletta. Elecziuns hajan lieu la fin d'october 2025.
Sco anteriur president e lur lung temp mainagestiun da la Regiun Surselva haja Duri Blumenthal las experientschas necessarias per sia incumbensa sco cumissari. Plinavant enconuschia el la situaziun politica da la Regiun.
Las raschuns per la demissiun andetga dal chemicher, biolog ed econom Alexander Ernst sajan differentas posiziuns en ils cuntegns tematics da las fatschentas. La collavuraziun actuala na pussibiliteschia betg pli da lavurar en confidenza vicendaivla.
La suprastanza actuala consista be pli da duas persunas, Katrin Blumberg, la presidenta e Daniel Tuggener. Per esser cumpetent da decider dovri dentant almain trais persunas en suprastanza. Perquai survegn la suprastanza da Sagogn sustegn da l'Uffizi chantunal da vischnancas. Quel elavura actualmain mesiras per la vischnanca.
Dus suprastants han gia demissiunà avant in per mais
Hannes Furger, il responsabel dal departament de bajegiar sco era Martin Hunger, il responsabel per l'agricultura e las alps, han terminà suenter mo in onn en uffizi – l'entschatta da la stad 2025. Furger ha fatg quai ord motivs persunals, Hunger pervi da la sanadad.
La vischnanca sto uss tschertgar trais persunas per la suprastanza. La proxima chaschun è durant la radunanza communala, ils 23 d'october 2025. Ils ultims onns sajan las elecziuns savens stadas spontanas, senza candidatas u candidats annunziads ordavant, di la presidenta communala Katrin Blumberg. Ella spera che quest sistem funcziunia era quella giada.
Per ils dus posts ch'eran gia libers il zercladur, n'hai betg funcziunà – a la radunanza communala dals 20-06-2025 – n'ha nagin mussà interess da candidar.
La tschertga va vinavant
Suenter la radunanza communala ha la presidenta communala Katrin Blumberg ditg a la FMR ch'ella veglia eruir ils motivs per la mancanza d'interess. Sch'ins sappia tge che saja il problem, saja era pussaivel da chattar ina via da chattar candidatas e candidats. En il fratemp saja da quintar cun retards tar dumondas, scriva la vischnanca.
Facit suenter in onn en uffizi
Il facit da Katrin Blumberg è suenter in onn presidi communal bun. La nova suprastanza haja gì da tractar blers dossiers vegls, la lavur na giaja betg ora, manegia la presidenta da Sagogn. Tar ina da quellas grondas lavurs tutga la via da colliaziun da Sagogn vers Laax ch'è dapi onns in tema permanent. Là dettia ussa ina schliaziun definitiva, uschia ch'il project giaja vinavant.
Tar l'auter grond project, la revisiun totala da la planisaziun communala, dettia anc ina protesta che retardeschia il process.
Nus avain survegnì bler feedback positiv davart nossa communicaziun e noss discurs.
La glieud da Sagogn para d’esser cuntenta cun ses timun: Ina enquista tar la populaziun haja mussà quai. Il pievel laudia la communicaziun e la disponibladad da la suprastanza, uschia la presidenta communala.