Avant passa 40 onns haja il bab da Jan Cadieux, ch'era Canadais, dumandà sche sia famiglia dastgia daventar burgaisa da Surcuolm. E quai, suenter ch'els avevan gia empruvà da daventar burgais da Langwies en il Scanvetg, là dentant senza success, quai ha raquintà l'anteriur chanzlist da Surcuolm Hiazint Brunold.
La mamma da Jan Cadieux era burgaisa da Langwies. Ses bab ch'era canadais n'han els betg prendì si a Langwies. I aveva gì num perquai ch'el era catolic. Jau na sai dentant betg, sche quai constat.
A Langwies n'hai betg funcziunà per ils Cadieuxs, perencunter a Surcuolm. La radunanza communala da Surcuolm ha decidì ils 18 da settember 1982 da prender si questa famiglia sco burgaisa. Ma pertge ha la famiglia Cadieux gist spluntà a Surcuolm?
Il giurist e cussegliader ch'il bab aveva lura era da Cuira, il Merens Cahannes. El era vicepresident da las pendicularas dal Piz Mundaun ed aveva uschia ina tscherta relaziun cun la vischnanca da Surcuolm.
Ils Cadieux sajan stads ina giada a guardar il territori da skis, abità u gì in domicil da vacanzas a Surcuolm n'hajan els dentant mai. Uschia che Jan Cadieux è plitost be sin pupi in Grischun.