Dapi il brischament da la «Casa Carigiet» èn quasi passads quatter onns. Dapi lura spera la populaziun da Trun ch’il bajetg sin plazza Cadruvi vegnia renovà u allontanà. La cumpra da las chasas tras l’uniun Trun Cultura e ses donatur cont Luca Padulli è succedida la stad 2021. Sinaquai è vegnì projectà e planisà ed il motto era da spetgar fin ch’ils daners èn avant maun per lura cumenzar cun las lavurs, uschia ha l’architect Remo Derungs raquintà a la radunanza da vischnanca da Trun. Ma quella strategia bandunian els uss per pudair far visibel il progress dal project. Las lavurs da rumir il bajetg, quellas cumenzian uschè spert sco pussaivel, ma segir la primavaira, han ditg ils responsabels. Alura duai vegnir construì in tetg sin il bajetg e vegnir allontanà il palancà cun il tetg provisoric.
Daners anc betg avant maun – ma avunda per cumenzar
Tut ils daners na sajan anc betg avant maun. Probablamain vegnian els a duvrar be per la Casa Carigiet en total 4 milliuns francs, ha il president da Trun Cultura Armin Niederberger ditg. Ma els hajan avunda daners per cumenzar, e quai fetschian els uss. Sin la Casa Carigiet duai dar in tetg plat che serva era per concerts u vernissaschas. Quest tetg vegnia a proteger la substanza existenta, ma era quel saja mo ad interim. Il plan final prevesa da realisar in tetg sco avant il brischament, uschia Remo Derungs. La stad proxima veglian els pudair esser a fin cun il tetg e cun rumir il bajetg, uschia che quel possia vegnir nizzegià, ma l’emprim senza infrastructura, pia senza fanestras e senza stgaudament.
Tut las chasas duajan esser finidas sin il 2026
La visiun da Trun Cultura è da far accessibel trais bajetgs per la cultura a Trun. L’entir project duai custar radund 6,5 milliuns francs. Dasper la Casa Carigiet duai vegnir realisada era la chasa Desax ed en l’anteriura fabrica in'auzada per il Spazi Spescha. Il Spazi Spescha vegnia realisà l’auter onn ed il relasch da l'artist da Trun Matias Spescha vegnia transferì da la Frantscha a Trun. Il contract cun la Distec, la possessura da las localitads, saja sin maisa, ma anc betg suttascrit, uschia Armin Niederberger. L’emprima exposiziun è dentant gia planisada per la stad 2023 e vegnia era realisada.
Preventiv cun gudogn e sbassar il pe da taglia
Suenter la tractanda da Trun Cultura ha la radunanza communala da la vischnanca da Trun approvà unanimamain il preventiv per il 2023. Budgetà è in surpli d’entradas da radund 2,8 milliuns francs, quai tar entradas totalas da 10,8 milliuns. Surtut las entradas supplementaras tras la vendita d’energia muntan a 3,2 milliuns francs, uschia è vegnida orientada la populaziun. Perquai ha la suprastanza era proponì da sbassar il pe da taglia da fin uss 105% sin 95% da la taglia chantunala simpla, la radunanza da vischnanca ha approvà unanimamain la proposta.
