Siglir tar il cuntegn

Header

audio
Casa Carigiet: Anc betg dapli ch'ina visiun
Or da Actualitad dals 12.04.2022.
abspielen. Laufzeit 3 minutas 25 Sekunden.
cuntegn

Trun Per sanar la chasa Carigiet mancan ils daners

Trun Cultura ha cumprà la chasa Carigiet cun agid d’in donatur. Proximamain vulevan ins cumenzar cun las lavurs da sanaziun, dentant mancan il mument anc ils daners per pudair realisar quest project, di Lisa Schmidt-Candinas – l’actuara da l’uniun. Er na saja betg prudent da cumenzar cun las lavurs da rumida, era sch'ils daners per quellas lavurs fissan avant maun. Lura puspè stuair far ina pausa, quai na saja er betg bun per ils mirs dal bajetg e la substanza duai era vegnir mantegnida, uschia Lisa Schmidt-Candinas.

Per sanar la chasa paterna dals artists Alois Carigiet e Zarli Carigiet duvrass l’uniun circa 5,5 milliuns francs, quels sajan els uss vid tschertgar. Vinavant saja l’uniun en contact cun il cont Luca Padulli, ch’ha finanzià la cumpra da las chasas Carigiet e Desax, ma fin uss n’hajan els betg anc dumandà per sustegn era tar la finanziaziun, quai pudess dentant propi era succeder, uschia Schmidt-Candinas.

Finir la sanaziun fin il 2024, anc pussaivel ?

Ina da las finamiras era da finir la sanaziun da la chasa Carigiet sin il giubileum da 600 onns Ligia Grischa il 2024. Quai saja anc adina la finamira, ma els stoppian restar realistics. Sch’els hajan lura cumenzà cun las lavurs stoppian ins gia esser cuntent, perquai che la tschertga da daners saja difficila, surtut durant in temp da pandemia e da guerra nua ch’autras chaussas han prioritad e pli pauc la cultura.

Uschia na saja la finamira probabel betg pli realistica, di Lisa Schmidt-Candinas. Ma in aspect positiv haja era purtà: uschia haja dà in pli stretg contact cun il Museum Ligia Grischa ed en futur duai era dar ina collavuraziun tranter las chasas, ch’èn quasi vischinas. Ma la visiun da crear a Trun in center da l'art grischun, ed era in center da l’art architectonic saja senz’auter anc realisabla. Er il Spazi Spescha en l’anteriura fabrica da ponn da Trun saja sin buna via, ma era qua dettia il mument anc da sclerir pliras chaussas, avant ch’ins po realisar il project. Ma els sperian uss fitg ch'i vegnian signals positivs da las radund 60 fundaziuns dumandadas per sustegn.

RTR actualitad 12:00

Artitgels legids il pli savens

Scrollar a sanestra Scrollar a dretga