En sia davosa sesida, ils 28 da zercladur, ha il cussegl da Vischnanca Tujetsch approvà unanimamain la revisiun dal regulativ da fatschentas da la vischnanca e deliberà quella per mauns da la radunanza communala. Plinavant ha la nov elegida suprastanta Desiree Willimann gì da prestar il sarament d'uffizi davant il cussegl da vischnanca. Ella surpiglia il departament d'economia e turissem da Renato Decurtins ch'è sa retratg sin la fin da zercladur.
Cunquai che quella trentavla radunanza dal trienni 2020/2023 en la chasa da scola a Sedrun era la davosa insumma, ha la protocollista gì in zic dapli squitsch. Il cussegl ha gì d'approvar sco davos act uffizial il protocol da la medema saira. Suenter bain prest 50 onns en sia furma sco el ha existì enfin oz, dat el giu sia surveglianza suprema da l'administraziun communala.
Ina èra va a fin
Il cussegl da vischnanca ha mintgamai gì d'eleger in president or da ses mez per in onn. Sabrina Flepp è stada la davosa presidenta dal cussegl da vischnanca. Ella ha uschia manà la radunanza ed er accentuà il caracter istoric da la radunanza. Quest ha ella fatg cun in pitschen excurs en l'istorgia dal cussegl. Gia en al constituziun da l'onn 1886 eran ils cussegliers numnads, quest sco «Zuasatz». Il cussegl, sco el ha existì enfin quest zercladur, dettia dapi 1974, alura aveva il cussegl 17 commembers. L'emprima dunna el cussegl è stada Matilda Schmid.
Sch'ins patratga suenter èsi in pau curius ch'i na dat suenter betg in cussegl da vischnanca, ma quai ha il pievel decidì e quai èsi d'acceptar.
En ina votaziun consultativa avevan 60 % da las votantas ed ils votants votà d'abolir il cussegl da vischnanca cun ses 11 commembers. Ils motivs per quest resultat sajan grevs da dir, uschia il president communal da la Vischnanca Tujetsch, Martin Cavegn. In argument saja segir stà ch'ins na chattava betg las persunas per il cussegl. Ed era l'influenza da persunas fitg fermas sin l'opiniun dal cussegl saja stada per tscherta glieud in motiv da votar encunter il cussegl da vischnanca.
