Il cumenzament da la stad passada ha la radunanza da vischnanca da Tujetsch concedì in credit da 9,8 milliuns francs per la sanaziun e per l’engrondiment dal bogn Sedrun. Gia lura èsi vegnì infurmà ch'il project possia surpassar ils custs per circa 15% dal pretsch total.
Quai muntass ch’ils custs maximalas na dastgassan betg surpassar la summa da 11,28 milliuns francs. Sco il president communal da Tujetsch Martin Cavegn ha orientà na saja quai betg il cas. Suenter che las offertas èn vegnidas avertas ils 7 da favrer è sa mussà ch’ils custs maximals surpassan il credit concedì per 1 milliun francs.
Perquai stoppian els ir sur ils cudeschs e mirar da spargnar. E sche necessari vegnian els a stuair dumandar danovamain per la lubientscha, l’emprim il parlament communal e suenter la radunanza da vischnanca, declera Martin Cavegn. Quai saja per els tuts ina surpraisa perquai ch'els hajan calculà a moda generusa ed uss surpassian las offertas il credit. Ils responsabels hajan els fatg attents da mirar sin ils custs, ed la populaziun saja stada infurmada. Quai fetschian els uss era vinavant, di Martin Cavegn.
Per la segunda giada refusà in credit per in passape a Tschamut
A Tschamut na datti definitiv betg in passape per la via principala. Quai ha il parlament communal decidì. Cun 350'000 francs è il project anc vegnids 100'000 francs pli bunmartgà ch'avant in onn, cura ch'il parlament ha refusà l'emprima giada il project. Ils respargns fissan vegnids da laschar davent la cuvrida dal passape.
Ils arguments principals da refusar la fatschenta cler cun set Na cunter quatter Gea era che la necessitad per in passape na saja era in onn pli tard betg dada. Il vischinadi da Tschamut haja uschè paucs abitants sco anc mai e perquai na dovria quai betg in passape. Era l’argument d’augmentar la segirtad n’ha betg persvas.
Chantun vegn a sanar la via a Tschamut
Il chantun aveva contactà la vischnanca da Tujetsch per sclerir sch'i dettia in interess da meglierar la situaziun en il vischinadi da Tschamut. Uschia sanass il chantun la via e la vischnanca fiss stada responsabla per il passape. L’avantatg fiss stà che la via tras il vischinadi vegn realisada proximamain, uss vegn quella sanaziun fatga pir en plirs onns, era in dals arguments da la suprastanza. La fatschenta saja uss definitivamain giud maisa, era sche quai avess purtà avantatgs per la cooperaziun d’aua sco era per l’energia alpina e sias lingias d’electricitad, argumentescha la suprastanza. Els acceptian natiralmain la decisiun dal cussegl e guardian uss vinavant co meglierar la situaziun, eventualmain era en connex cun la lescha da promover il traffic plaun.
Approvà ils contracts d’affittaziun
Approvà ha il parlament communal da Tujetsch percunter ils contracts d’affitaziun en la zona da mastergn e quai unanimamain. Ils contracts cun las interpresas da construcziun indigenas èn limitads per 10 onns e portan en quest temps entradas totalas da radund 420’000 francs. La finamira principala è da porscher plaz a las interpresas e da meglierar la zona da mastergn actuala, accentuescha la suprastanza.
