La situaziun da traffic saja sa midada fitg ils ultims dus onns, declera il president communal Martin Cavegn. Perquai era planisà da realisar in passape a Tschamut, l’ultim vitg grischun avant che vegnir sur il pass Alpsu ad Ursera. Planisà era d’investir radund 450’000 francs en quai passape. Era il chantun vuleva investir e gist adattar lev la via per garantir la segirtad, era fiss quai stà pussaivel da gist far las investiziuns necessarias en la chanalisaziun, declera Martin Cavegn. Quai na saja uss tut betg pli pussaivel.
La formulaziun «dapli segirtad» po era vegnir malduvrada
Per il cussegl communal da Tujetsch saja quai stà d’evaluar schebain ina tala investiziun rendia e la finala saja la decisiun crudada piz a cup cun tschintg cunter sis vuschs e la vusch da tagl dal president Arno Berther. El possia senz'auter responsar quella decisiun, pertge la vischnanca na possian betg investir en in passape d’ina ladezza da quasi dus meters en in vitg pitschen, nua che naginas famiglias abiteschian di Arno Berther. La situaziun finanziala da la vischnanca saja il mument anc buna, ma a lunga vista è planisà da realisar la sanaziun dal bogn a Sedrun ed il daivet per persuna a Tujetsch vegnia a s’augmentar sin dapli che 5’000 francs. Perquai saja da trair en la tschinta e spargnar er sche la decisiun da far quai, saja adina greva, di Arno Berther.
Segirtad publica versus privata
Era saja la situaziun cun in sulet interprendider a Tschamut quella ch’ins avess quasi sustegnì in manaschi privat, e la segirtad saja er ina dumonda che l’interprendider stoppia resguardar, per exempel sche l’entrada saja en il lieu ideal u betg, declera Arno Berther. I na saja betg adina ina dumonda da la communitad. Per l’avegnir da Tschamut fiss quai necessari che famiglias vegnian ad abitar, ma quai na saja betg la situaziun ed uschia na saja l’investiziun era betg giustifitgada.
Per la suprastanza n'è quai dentant nagin argument. La qualitad da viver saja impurtanta era en ils vischinadis ed era per las persunas che veglian far vacanzas. Uschia saja la segirtad dal traffic era part da quella qualitad e la vischnanca saja responsabla da mantegnair l’infrastructura. En quest cas sajan però las finanzas stadas pli impurtantas che la segirtad, di il president da vischnanca Martin Cavegn, quai ch’el deploreschia.
