La construcziun da la chasa da scola a Tujetsch è stada il 1960-1961. Ils prims scolaras èn lura ids a scola il 1962 en las localitads novas. Dapi lura è bler sa midà en Tujetsch. Il dumber da scolaras e scolars e sa sminuì, uschia che la scola a Sedrun è la suletta en la vischnanca. Oz frequentan 86 scolaras e scolars da la scoletta fin en il stgalim superiur la scola a Sedrun. Ma il dumber da scolaras e scolars n’è betg decisiv per ina sanaziun dals bajetgs. Quai stoppian ins sparter, declera il president communal Martin Cavegn.
Nus stuain sanar ils bajetgs da la scola – surtut il tetg, las lingias d’aua e las tualettas.
Era sa midadas ils ultims onns èn las leschas. Uschia ston vegnir applitgadas la lescha d’egualitad e la lescha cunter donns da terratrembels. Quai stoppian tut ils edifizis publics ademplir, declera Martin Cavegn. Per vegnir da far quai ha la vischnanca laschà elaborar in preproject. E auel ha ella preschentà a la populaziun da la vischnanca da Tujetsch.
Nov bajetg d’annexa schlia problems da la statica
Per garantir la segirtad tar terratrembels ston vegnir fatgas adattaziuns en l’entira statica dal bajetg. Suenter ina emprima varianta che avess chaschunà grondas mesiras, ha la segunda varianta persvas la suprastanza. Nus vulain construir nov il bajetg annex. Ed en quella construcziun pudain nus integrar novs mirs che segireschan uschia l’entir bajetg existent da la scola da terratrembels. Il medem vala per l’ascensur che vegn integrà. Era quel vegn construì cun mirs massivs che segireschan uschia l’entir bajetg en cass d’in terratrembel.
Bajetg vegn multifuncziunal
La vista en il futur tar il dumber da scolars fa supponer che la scola Sedrun resta forsa betg adina ina scola. Perquai ha la suprastanza da Tujetsch laschà examinar il diever multifuncziunal. Nus na vulain betg abitaziuns en scola, pertge lura stuessan nus ussa construir l’abitaziun e duvrar ella per la scola, di Martin Cavegn. Quai na vulain nus betg. Ma in diever per exempel per biros ni praticas, fiss tut tenor pussaivel.
La scola ha gia uss duas entradas cun stgalas, uschia ch’ins pudess sparter il bajetg, sche quai fa basegn, di Martin Cavegn. Il diever principal resti dentant segir per ils proxims onns la scola e cun la sanaziun possian gist resguardar ils basegns d’ina instrucziun moderna cun adattar las stanzas da scola ad in diever modern.
Investiziuns da passa 4 milliuns francs
Per realisar il project è previs ina summa d’investiziun da 4,2 milliuns francs. Quai na saja betg ils custs definitivs da l’entir project. Ma bajegiar saja char, ha il president communal declerà a la populaziun. Il mument è il project sulet il bajetg da la scola – betg integradas èn la veglia halla da gimnastica e l’abitaziun dal pedel.
La populaziun ha en plirs votums accentuà da far ina chaussa endretga ed era gia integrar la sanaziun da quests dus bajetgs. Sco il president communal ha accentuà vegnian els uss era ad integrar la sanaziun da questas duas parts en il project. Uss vegn la vischnanca ad elaborar il carnet da duairs ed lura surdar las lavurs ad in biro d’architectura per elaborar il project definitiv. La finamira è dad ir sin radunanza da vischnanca anc quest onn cun il project e cumenzar cun las lavurs almain il 2027.