La populaziun da Siat ha para pauc plaschair da la plazza da campar a Cuort che sa chatta gist sur il vitg. Almain la maioritad da la populaziun ch'è stada preschenta ad ina saira da discussiun l'entschatta favrer. Ina sentupada organisada dal represchentant da Siat en il parlament communal, Elias Casanova.
Nus avain fatg ina votaziun consultativa e dus terzs dals preschents èn stads da l'opiniun che la plazza da campar stoppia svanir.
Pli gugent oz che damaun, sco quai che Elias Casanova ha explitgà envers la FMR. En ina brev drizzada a la vischnanca da Glion ha il parlamentari formulà las resalvas vers la plazza da campar ch'èn vegnidas ord il ravugl da las bun 30 persunas stadas preschentas a la saira da discussiun.
Blera malaveglia
En quella brev pon ins leger ch'il campadi a Siat saja vegnì erigì durant ils onns da corona per dumagnar il «hype» da campar dasdà en Svizra, perquai ch'igl è per in temp betg stà pussaivel da far vacanzas a l'exteriur. Per metter a disposiziun in indriz sanitar modest ha la vischnanca plazzà a l'ur dal plaz in uschenumnà compotoi. «Deplorablamain è l'interess da campar creschì ad in crescher, pli probabel perquai che la purschida è gratuita.»
En la brev a la vischnanca vegn tranter auter fatg attent ch'ils campaders tegnan betg urden. Saja quai cun dismetter ruments en il guaud u far ils basegns en la natira. E quitads fa era l'observaziun ch'i vegn mintgatant fatg fieu a l'ur dal guaud e ch'ils autos da campar tschertgan ulteriur plaz per lung da diversas vias da meglieraziun cura ch'il campadi saja occupà. «Vinavant è vegnì fatg stem ch'ils autos da campar svidan lur tancs cun l'aua tschuffa en ils molocs da rument u svidan els en la tualetta publica.» La quintessenza formulada en la brev è clera. «La mentalitad dal pievel da campar sustegn ni nossa stizun dal vitg ni las ustarias, il campadi na porta nagut auter che malempernaivladads e disgust.» En la brev vegn schizunt fatg allusiun ch'il campadi saja vegnì installà senza las lubientschas necessarias e saja perquai illegal.
La vischnanca ha chapientscha
La reproscha da l'illegalitad vul il vicepresident da la vischnanca da Glion, Martin Capeder, betg laschar valair. «Il campadi è lubì sin fundament dad ina lubientscha movibla che vegn prolungada onn per onn.» Il vicepresident conceda dentant che la suprastanza communala haja chapientscha per las resalvas da la populaziun da Siat e vegn per quest motiv a serrar il campadi a Cuort.
Nus avain gì in sumegliant indriz a Fontanivas che nus avain medemamain stuì serrar.
Martin Capeder è da l'opiniun ch'il problem da campar vegn betg simplamain a svanir a Siat cun serrar il campadi. Pli probabel vegnia el simplamain a sa spustar in pèr meters sin il parcadi public en la vischinanza. Da questa opiniun è era Elias Casanova, perquai pretenda el da stizzar il campadi sin las applicaziuns ch'inditgeschan ils lieus da campar e che la polizia communala fetschia, almain ils emprims mais, dapli controllas.
Valur turistica
A la sentupada da l'entschatta favrer hai dentant era dà vuschs che han pledà a favur dal campadi pervia da l'interess turistic. Quai fatg conceda era il parlamentari Elias Casanova che fa attent che quellas vuschs hajan pretendì ch'i fiss prudent da bajegiar ora il campadi en furma legala, pitschna e schubra.
In'idea che chatta era ina tscherta simpatia tar la vischnanca, sco quai che Martin Capeder tradescha. «Aifer la planisaziun locala avain nus previs da stgaffir en quest lieu ina zona da campar.» Era sch'il campadi actual vegn proximamain serrà vul la vischnanca laschar la zona da campar en la proposta per la planisaziun locala nova. Per cas ch'ins vuless pli tard tuttina stgaffir en quest lieu ina plazza da campar. L'interess per campar a Siat para d'exister, almain tar las persunas sin via cun la rulotta.