Paucs onns avant n’avevi en il vitg da Sevgein strusch pli famiglias giuvnas, per betg dir uffants. Lura, amez ils onns 70, ha in svilup favuraivel cumenzà ch'è sa tegnì fin oz. Sevgein ha uniuns activas, bunas cundiziuns demograficas. Sevgein ha ina scola e schizunt ina scolina. Ina da las pitgas da la vita sociala è l'uniun da dunnas. Quella han ellas fundà il 1975. Quest onn èsi 50 onns dapi ch'ellas han dà in bun stausch al svilup ed a la vita sociala da lur vitg. Quest termin ha intimà l'uniun da dar in sguard enavos e da festivar il mez tschientaner. Quai fa ella cun in project che vegn a dar da discurrer: L'Uniun da dunnas è il center da la nova exposiziun speziala dal Museum Regiunal Surselva (MRS) a Glion.
Integrà en ina part generala
Oriundamain èsi stà lur plan d'organisar ina commemoraziun en il vitg. Ellas èn sa decididas da preschentar lur uniun en in'exposiziun a Sevgein. Uras d'avertura, surveglianza, accumpagnament dals visitaders ed era preschientscha permanenta è sa mussà sco gronda sfida. «Sin quai han ellas contactà mai», raquinta la manadra dal MRS. Ursina Jecklin Candrian ha sentì l'entusiassem. Ella ha sa laschà mussar ils plans dal project giubilar ed è stada immediat fieu e flomma. Gea, cler, fitg gugent, las localitads dal MRS sa porschian per tala tematica, ha ella respundì. Ina suletta cundiziun haja ella fatg a las dunnas da Sevgein, tradescha ella: I stoppia numnadamain dar ina part generala che preschentia era l'impurtanta rolla che las dunnas han gì en la vita sociala da vitgs e citads.
L'exposiziun speziala en il MRS a Glion è pia stada decidida. Ditg e fatg. Uschia è in comité sa furmà cun represchentantas da Sevgein e dal MRS. Sco accumpagnadra artistica ha Ursina Jecklin Candrian proponì Yvonne Gienal. Ellas duas, ensemen cun Flavia Walder, Iris Cadalbert, Ida Maissen e Tabea Ammann han furmà il comité d'organisaziun da l'exposiziun.
Las colurs da Sevgein
Ussa èsi bainbaud uschè lunsch, las preparativas èn fatgas, las installaziuns al lieu ed en curt è la vernissascha. 30 commembras da l'uniun da dunnas da Sevgein èn entretschadas en il project – entretschadas en il ver senn dal pled. Ursina Jecklin Candrian menziunescha ina part, l'object simbolic da l'exposiziun. «Las dunnas da Sevgein han fatg cun crutsch ina tretscha che tanscha davent da Sevgein fin giu Glion». Igl è in chanè gigantic da 2’700 meters en colurs blauas ed alv. «Igl èn las colurs da Nossadunna», motiveschan las dunnas da Sevgein. Dentant era las colurs da la vopna da Sevgein che mussa sin fund blau ina crusch da voluta d'argient. Tut las dunnas èn sa participadas a la lavur manuala, tuttas han fatg ina part.
L'exposiziun speziala en il MRS a Glion ha il titel «Nus dunnas – Nus faschain e basta!» En il center è l'istorgia da l'uniun – ed uschia era la rolla da las dunnas en ils vitgs muntagnards.
L'exposiziun mussa quai ch'è savens nunvesaivel – la contribuziun preziusa da las dunnas en politica, educaziun, lavur voluntaria, religiun e lavur per societad e cultura.
L'avertura da l'exposiziun è venderdi, ils 12 da settember 2025, e quai cun in'acziun ch'ins po taxar sco spectaculara: «Avant la vernissascha a las 19:00 vegn il chanè gigantic derullà, e quai durant ina spassegiada cuminaivla da Sevgein a Glion en Casa Carniec», tradescha la manadra dal museum.
Novitads, eveniments ed istorgias localas. Tut tge che curra e passa en la Surselva chattais vus qua.