En Val Lumnezia è il project «Las Valerusas» mess sin glatsch. Sco quai che la suprastanza communala Lumnezia communitgescha, n'hajan ins chattà naginas persunas per surpigliar il timun da diversas incaricas. Ord quest motiv na sajan las preschentaziuns planisadas il 2021 betg pli realisticas.
Spustar sin l'onn 2022 na vegnia betg en dumonda pervi dad auters projects gia planisads. Pli realistic paria l'onn 2023. I dovria dentant in comité d'organisaziun. Sch'i na dettia betg in tal enfin la fin da l'onn vegnia sepulì il project ed il credit scadia.
Igl è era pussaivel che «Las Valerusas» fan naufragi. Alura è quai in cler mussament che in tal project n‘è betg dumandà per il mument. E quai ston ins era acceptar.
«Las Valerusas»
Il gieu «Las Valerusas» tematisescha la guerra da Belmont l'onn 1352 e la rolla prominenta, che vegn attribuida a las dunnas lumnezianas da lez temp. Uschia vegn quintà, ch'ils umens sajan stads a s.Carli sut il Mundaun en il cumbat cunter l'adversari – fertant che quel ha empruvà ina segunda attatga a Porclas. Ma l'inimi n'ha betg fatg quint cun las dunnas lumnezianas. A Porclas hajan «Las Valerusas» stgatschà l'adversari cun lavinas da crappa e laina bunamain en il stil dad ina segunda guerra da Morgarten.
