Avant bundant duas emnas han ins legì en las medias ch’il Bogn Tenigia en la Val Sumvitg haja dus possessurs: Per l’ina Rolf Diefenbacher che ha sez annunzià il fanadur 2023 d'avair cumprà l'hotel. E per l’autra il duo Anton (Tony) Meier e Sven Patrick Stecher dad Eglisau en il chantun Turitg. Els èn tenor il register da commerzi dapi ils 14 d’avrigl 2026 president e commember dal cussegl d’administraziun da la Bogn Tenigia SA e damai ils administraturs da l'hotel.
Entant che la dumonda davart il possess n'è anc betg sclerida definitivamain, han Tony Meier e Sven Stecher prendì posiziun envers il portal da novitads online Züriunterland24 – senza dentant commentar la causa Diefenbacher. Ils dus Turitgais veglian «bitschar il Tenigia ord il sien», quai stat scrit en l'artitgel.
Entschaiver pitschen, patratgar grond
Sin dumonda da la FMR ha Sven Stecher confermà il rapport da Züriunterland24. «Nus vulain far flurir il Tenigia», ha il sviluppader d’interpresas e giurist ditg. Avant ch’el e ses collega prendian en mira projects pli gronds, veglian els dentant entschaiver cun pass pitschens: «Sco emprim lain nus realisar implants solars sin la fatschada. E lura èsi da segirar intgins balcuns che smanatschan da sballunar. Quai fiss donn.» Inizialmain saja la finamira da stabilir in’economia d’electricitad per segirar las lavurs administrativas.
A lunga vista vulan els dentant bain era puspè carmalar osps en la Val Sumvitg, di Sven Stecher: «En mira vain nus giasts da differents segments. Nus lain realisar relativamain spert ina plazza per campaders. Silsuenter fissi previs da restaurar il bajetg dals onns 70 per osps regulars e sco davos il bajetg vegl per osps da luxus.» In ulteriur tema saja dentant era da realisar ina tratga da peschs. Ils plans na mancan pia betg als dus Turitgais. Tenor Sven Stecher sajan els sco martè e gutta: L'investur Tony Meier che contribuescha la forza – era finanziala – e Sven Stecher che sa fatschenta cun dumondas pli detagliadas e la coordinaziun.
Nagin contact cun Diefenbacher
Rolf Diefenbacher na gioga en ils plans da Sven Stecher e Tony Meier fertant nagina rolla pli. Ins n'haja nagin contact cun l'anteriur «possessur» dal Bogn Tenigia. E sco che Sven Stecher ha ditg, saja la dumonda dal possess tenor el relativamain clera: «Rolf Diefenbacher ha cumprà la Bogn Tenigia SA en il num d’ina societad da holding da Tony Meier. Pervia da quai è Tony sco acziunari unic stà legitimà da decider davart il cussegl administrativ e da remplazzar Rolf.» Anc n'èsi dentant betg cler, sche questa dumonda è propi sclerida u sch'i dat anc ina dispeta giuridica.