Blers onns èn las localitads da la disco e bar Postigliun a Mustér stadas vidas e bandunadas. Avant dapli che trais onns ha Pirmin Monn cumprà l’anteriura disco e bar. L’emprim ha el renovà las localitads en il plaunterren per sia stizun da resti da sport per alura cumenzar cun la restauraziun da las localitads da disco e bar sutteranas. Tut ha gì da vegnir fatg nov, ils palantschieus e las paraids, ma era tut las lingias d’electricitad e las bars. Pia quasi tut, di Pirmin Monn. Perquai haja quai durà pli ditg, ma uss saja el pront ed el sentia in grond sustegn da tuttas varts per l’avertura da la disco e bar Postigliun.
Blers han regurdientschas vida questas localitads
Per la gronda part da la glieud ch’è vegnida a l’avertura èn las localitads colliadas cun regurdientschas vida bellas festas e buna cumpagnia. Tuts hajan sia istorgia da «il Posti», sco la disco vegn numnada a Mustér. Uschia sajan stads töffs sin il palc da sautar, ma era umans da naiv e bler auter saja capità, uschia hajan era plirs emprendì d’enconuscher lur partenari en questas localitads, declera Pirmin Monn. Per el saja quai uss propi daventà ina passiun da porscher ina localitad da sortida a Mustér, di l’um che lavura en plazza cumplaina tar ina interpresa indigena. Il plan saja d’avair avert las fins d’emna e quai per giuven e vegl.
Giuventetgna tschertga localitads da divertiment
Era la vischnanca da Mustér beneventa l’avertura da la disco Postigliun. En plirs inscunters cun la giuventetgna saja adina puspè vegnì giavischà dapli pussaivladads dad ir en sortida, ha declerà il president communal René Epp. Perquai sajan els era s’inscuntradas pliras giadas cun Pirmin Monn per vegnir ad ina conclusiun che cuntenta tuts. Era il possessur dal Postigliun conferma las entupadas, quai haja dà motivaziun supplementara d’avrir da nov il Postigliun pertge el haja sentì il giavisch e sustegn da pliras varts.
Evitar canera ord dadora
Ina da las raschuns daco che la disco Postigliun aveva stuì serrar las portas eran las reclamaziuns permanentas da las vischinas ed ils vischins amez il vitg. Pertge la canera dadora era adina puspè in problem. Era ils possessurs d’abitaziuns en quella chasa, ma era en las chasas vischinas san ch’ina disco e bar vegn a dar canera. Ma sch’ins giavischi vita en il vitg, alura na saja quai betg d’evitar, declera in dals abitants da la chasa Postigliun. Ma tuts speran ch’il manaschi po vegnir manads uschia che la giuventetgna e tut tgi che vul po sa divertir senza disturbar memia fitg e ch’era las proximas generaziuns han bellas regurdientschas vida festas e divertiment en «il Posti» a Mustér.
