Siglir tar il cuntegn

Header

audio
Flem decida bainbaud davart la nova pendiculara che maina en l'arena tectonica
Or da Actualitad dals 28.05.2021.
laschar ir. Durada: 06:32 minutas.
cuntegn

Votaziun dals 13-06 a Flem Revisiun parziala per l'avertura turistica da l'arena tectonica

Ils 13 da zercladur decidan ils da Flem sur da la revisiun parziala da la planisaziun locala e sur dal plan d’avertura da l’Arena tectonica Sardona.

Pitschnas midadas – gronds effects

En il plan da zonas datti midadas enturn la staziun da val da las pendicularas. Intginas parcellas vegnan assegnadas a la zona per bajetgs publics. Quai perquai che la staziun da val planisada da la nova pendiculara è pli gronda che l'actuala e perquai ch'igl è planisà in nov terminal da bus. Plinavant vegnan surpigliadas las zonas da privel en il territori da las staziuns da muntogna or dal plan da zonas da privel en la planisaziun d'utilisaziun.

En il plan d'avertura vegnan integrads il terminal da bus a Flem e la nova lingia da las pendicularas planisadas tranter Flem e Nagens, respectiv ils Cugns.

Pendiculara supermoderna

Cun la fin da la pendiculara Cassons, il 2015, n'è l'Arena tectonica Sardona betg pli stada colliada directamain per il turissem. Plans ed ideas co far quai, hai dà bleras. Cumenzà han ellas cun ina cabina da 250 persunas, pli tard ina mo da 150 persunas ed ussa è actuala la proposta da bajegiar ina pendiculara supermoderna cun cabinas da 10 persunas.

Gia avant ch'entrar en la cabina, duain ils giasts decider, nua ch'els vulan sortir. Uschia pon els restar en la cabina e na ston betg en mintga staziun sortir per cuntinuar il viadi. Plinavant curseschan las cabinas sulet, sch'igl ha er giasts. Uschiglio restan las cabinas en las staziuns.

Carta geografica che mussa l'actala colliaziun da l'Arena Tectonica a Flem
Legenda: la proposta actuala per la colliaziun da l'Arena Tectonica Sardona. MAD, VISCHNANCA FLEM

Adattaziun da la lingia per las pendicularas

Oriundamain vuleva l'Arena Alva colliar l'Arena tectonica Sardona davent da Flem sur Foppa, Startgels e Nagens. Pervi da resistenza da las organisaziuns d'ambient durant l'exposiziun da cooperaziun publica, è la lingia anc ina giada vegnida adattada. Da nov va la lingia davent da Startgels sin il plaun da Segnas e davent da là d'ina vart a Nagens e da l'autra vart vers Ils Cugns. Cun quella proposta èn las organisaziuns per la protecziun da l'ambient stadas cuntentas.

Tar in Gea a la votaziun dals 13 da zercladur 2021, duain las pendicularas planisadas esser construidas enfin la fin dal 2023.

RTR actualitad 11:00

Artitgels legids il pli savens

Scrollar a sanestra Scrollar a dretga