Siglir tar il cuntegn

Header

audio
Cussegl grond: Tge spetga en la sessiun da favrer?
Or da Actualitad dals 12.02.2024. Maletg: RTR
laschar ir. Durada: 5 minutas 56 Secundas.
cuntegn

Survista sessiun da favrer Program da regenza, plan da finanzas e lescha da tgira

Las deputadas e deputads s'inscuntran puspè. Sin la glista stattan il program da la regenza ed il plan da finanzas per ils onns 2025 – 2028, la revisiun parziala da la lescha da tgira sco er dumondas ed incumbensas en connex cun segirar vias, chauns da protecziun u er custs da sanadad.

In chantun pli digital, attractiv e persistent

Mintga quatter onns definescha il Cussegl grond ils accents politics per l'avegnir. Sin basa da quels elavura la regenza alura il program politic ed il plan da finanzas – pia ina sort mussavia per ils proxims onns. En la sessiun da favrer tractan deputadas e deputads las finamiras politicas ed il plan da finanzas per ils onns 2025 - 2028. En il center stattan quests temas:

  • transfurmaziun digitala en l'administraziun chantunala
  • Grischun sco lieu attractiv per viver e lavurar cun per exempel meglierar il traffic public u diversitad culturala
  • rinforzar la purschida dal turissem er sper il turissem d'enviern
  • chantun persistent cun garantir il provediment d'energia, promover energias regenerablas e proteger il clima
audio
Or dal pled d'avertura dal president dal Cussegl grond Franz Sepp Caluori
ord RTR Audio dals 12.02.2024.
laschar ir. Durada: 23 Secundas.

Sper las finamiras politicas vegn er il plan da finanzas dals onns 2025 – 2028 discutà. La regenza prevesa mintga onn cifras cotschnas. I va pia per mantegnair l'equiliber finanzial en il chantun Grischun. Quai vegn segir a dar discussiun en il parlament.

Revisiun parziala da la lescha da tgira

Il suveran svizzer ha ditg il 2021 cleramain Gea a l'iniziativa da tgira, in'iniziativa che pretenda da Confederaziun e chantuns che la tgira vegnia renconuschida e promovida pli fitg. Cun la revisiun da la lescha chantunala per promover la tgira da persunas malsaunas e l'assistenza da persunas attempadas e da persunas che basegnan tgira (lescha da tgira) vul il chantun realisar quai che l'iniziativa pretenda.

Tranter auter duai dar dapli daners per instituziuns che porschan la scolaziun pratica da persunal da tgira ed i duai er dar dapli paja e dapli sustegn per persunas che absolveschan ina scolaziun tar scolas spezialisadas superiuras (HF) u er tar scolas autas spezialisadas (FH). La Confederaziun surprenda fin 50% dals custs. Tut en tut quintan Confederaziun e chantuns che l'offensiva da scolaziun vegn promovida durant otg onns cun radund ina milliarda francs.

Il chantun vul, auter che la Confederaziun, er sustegnair l'emprendissadi da spezialista e spezialist da sanadad. Quai cun pajar contribuziuns a las instituziuns da sanadad che porschan l'emprendissadi. Uschia duai dar avunda plazzas per absolventas ed absolvents da l'emprendissadi.

Dumondas ed incumbensas: traffic public, luf e protecziun da muntaneras

Gist pliras dumondas han da far cun l'adattaziun da la purschida da la Viafier retica ch'ha dà da discutar las ultimas emnas. Deputadas e deputads vulan far squitsch e sa defender cunter ils plans da la Retica da stritgar tschertas lingias da tren e remplazzar questas cun bus. Er en connex cun sajettar lufs e la protecziun da muntaneras datti dumondas. Uschia per exempel vulan deputads savair tge che capita cun il program da chauns da protecziun da la Confederaziun. Avant in temp hai numnadamain gì num che la responsabladad dal program da tratga e tgira da chauns da protecziun giaja als chantuns.

RTR actualitad 12:00

Artitgels legids il pli savens