Concret sa giavischan 84% da las participantas e participants in u plirs auxiliars. Sin la dumonda sch'i preferissan be in u plirs uvestgs auxiliars per l'Uvestgieu da Cuira, din dapli che la mesadad (55%) ch'els preferissan plirs.
Sustegnair e stgargiar
Davart ils motivs per engaschar uvestgs auxiliars vegn numnà da stgargiar l'uvestg da Cuira, Joseph Maria Bonnemain. L'Uvestgieu da Cuira saja grond e divers – e perquai dovria là sustegn per l'uvestg. Plinavant duai la lavur da l'uvestg vegnir repartì meglier e l'uvestgieu pudess esser pli present en las pleivs. Er in uvestg auxiliar per Turitg u per la giuventetgna vegnan menziunadas.
Custs pli auts u dapli lavur d'administraziun vegnan numnads tar ils cunterarguments. Er il temp d'uffizi da l'uvestg che va a fin na saja betg ideal. Tenor l'uvestgieu hai dentant dà be paucas vuschs cunter in uvestg auxiliar.
Persuna autentica e communicativa
D'in uvestg auxiliar sa spetgan la pli gronda part da las participantas e participants ina persuna autentica e accessibla. Ella duai esser ina persuna che discurra e che taidla. Plinavant duai ella esser plain speranza e curaschusa. Ideal saja in spiritual cun experientscha en las plaivs e pastoraziun. Er in «construider da punts» vegn numnà.
Davart las caracteristicas d'in uvestg auxiliar spetgan las persunas dumandadas ina persuna communicativa ed integra. Plinavant duai ella savair lavurar en in team e discurrer pliras linguas. Uschia duai el avair in access a pliras culturas entaifer l'Uvestgieu.
Dumonda a Roma
Sco che l'Uvestgieu scriva, vegnian ins a dumandar il Vatican per quels uffizis. Sch'in post responsabel da la baselgia dat ses consentiment, vegnian ins a tschertgar ils candidats. La decisiun definitiva davart la persuna vegn ad esser tar Papa, Leo XIV. Sche Roma na vesa betg la necessitad d'in u plirs uvestgs auxiliars, fiss la dumonda dentant giud maisa.
Adattà al tema
La persuna ch'ha da decider davart uvestgs auxiliars a Cuira è Papa Leo XIV. Avant l'elecziun sco papa era el responsabel per ils uvestgieus. En quella funcziun ha er l'uvestg Joseph Maria Bonnemain discurrì cun el – e gì ina bun'impressiun.