Il Grand Resort a Bogn Ragaz sa separa nunspetgadamain dal cuschinier da stailas rumantsch, Andreas Caminada. Quai malgrà ch'il contract per sia ustaria fitg populara «Igniv» cuzzass anc fin il 2027.
Fin uss era be vegnì communitgà che l'ustaria (17 puncts, duas stailas) vegnia serrada durant las lavurs da renovaziun dal resort – dentant betg, che quella na vegn insumma betg pli averta, sco quai che «Gault&Millau» rapporta. Il Grand Resort veglia midar ses focus: enstagl dal «Igniv» duai da nov dar in restaurant tailandais ed in talian.
La fin d'in partenadi da plirs onns
Suenter 10 onns collavuraziun van ils dus partenadis pia vias separadas. Cunquai ch'il «Igniv» è adina stà fitg popular ed ha carmalà blers giasts èsi ina decisiun nunspetgada. Andreas Caminada acceptia la decisiun, scriva il «Gault&Millau». Il team da cuschiniers a Bogn Ragaz enturn il schef Joël Ellenberger vegnia enstagl a surpigliar novs projects aifer la gruppa da Caminada, declera il cuschinier prominent.
Il grondius team enturn il schef Joël Ellenberger vegn a surpigliar novs projects aifer nossa gruppa.
En consequenza sa retiria el dentant era da la firma da catering «Acasa» ch'el manava cun il Grand Resort, vegn Caminada cità.
Novs projects sin omaduas varts
«Nus vulain metter il focus ed investir en noss agens restaurants», ha Simon Spiller – il nov manager da Swiss Deluxe Hotels – declarà la decisiun da sa separar d'Andreas Caminada. Schegea ch'il «Igniv» è adina stà fitg popular, ha Swiss Deluxe Hotels fin uss stuì parter il gudogn cun la Caminada-Group. En l'avegnir veglia il Grond Resort pia emplenir ses agens dus restaurants novs ed era carmalar clientella pli giuvna.
Ma er Andreas Caminada ha cun sia Caminada-Group gia surpiglià ils ultims onns plirs projects sin quels ch'el po uss sa focussar anc pli intensiv. Pir il 2022 ha Andreas Caminada per exempel cumprà – ensemen cun The Living Circle – il Chastè Schauenstein a Farschno, nua che la Caminada Group è gia activa dapi il 2003 cun radund 74 emploiadas ed emploiads. La finamira saja da sviluppar vinavant ils manaschis existents a Farschno.
Or da l'archiv