Rumantschs èn pli cuntents
En general mussa la retschertga da Gfs.berna che las Svizras ed ils Svizzers èn en general cuntentas cun la vita. I dat dentant differenzas regiunalas. Uschè sajan persunas rumantschas e tudestgas pli cuntentas ch'en autras regiuns. En quest connex sa mussa en general che la Rumantschia è savens pli sumeglianta a la Svizra tudestga che als Tessinais u Romands.
Rumantschs èn in pau militarists
Il studi mussa che las bleras persunas sa sentan per gronda part segiras. Il motiv per quai èn per exempel il sistem giuridic che funcziunescha, dentant er stabilitad finanziala, politica e sociala. Qua sa mussa dentant ch'aspects da politica da segirtad èn pli impurtants per persunas rumantschas.
Collavuraziun cun l'Uniun europeica e participaziuns ad allianzas da segirtad (per exempel Nato) portan ina gronda part al sentiment da segirtad. Plinavant è ina armada ch'è abla da defender in aspect pli impurtant per Rumantschs – surtut en congual cun la Svizra taliana e franzosa.
Rumantschs èn socials
La retschertga «Co vai, Svizra?» mussa che grondas parts da la populaziun sustegna l'agir solidaric.
En quest connex paran persunas che discurran rumantsch anc in zic pli solidaricas. I dat ina pli gronda prontadad da desister a favur dad autras persunas. Per Rumantschs vegn pli ferm en dumonda da barattar ina abitaziun pli gronda cun ina pli pitschna per far plazza ad ina famiglia che dovra dapli plaz.
Rumantschs pateschan da masculinitad
Egualitad tranter ils genders datti en Svizra anc betg. Uschia vesa quai almain la pli gronda part da las persunas ch'èn sa participadas a la retschertga. Ils auturs menziuneschan er en quest sectur la Rumantschia. Persunas rumantschas vesian pli ferm mancanzas da la societad. Uschè èn ellas pli savens da l'opiniun che mammas che lavuran vegnan anc adina spretschadas.
Plinavant èn Rumantschs la suletta gruppa che di che dapli spetgas envers umens saja ina chargia adina pli gronda.
Rumantschs n'èn betg spirituals
Ina davosa differenza sa mussa tar la spiritualitad. Uschia sajan Rumantschs, sco er tudestgs, cleramain pli pauc spirituals che persunas da la Svizra franzosa e taliana.