En il Grischun lavuran cunfinarias e cunfinaris surtut en l'Engiadina, Val Müstair, Val Poschiavo e Bregaglia. Dus onns suenter che la cunvegna cun l'Italia davart cunfinaris e cunfinarias è ida en vigur, sentan ins las emprimas consequenzas en Grischun. Pervia da la cunvegna ston cunfinaris e cunfinarias numnadamain pajar taglia en Svizra sco er en l'Italia. Questa situaziun creescha in dilemma per l'hotel, che dependa fermamain dals cunfinaris per la stagiun d'enviern.
In collavuratur da mai ha survegnì in quint da taglia da l'Italia da passa 15'000 euros.
Pervia da quests custs da taglia restian adina dapli cunfinaris e cunfinarias en l'Italia e na tschertgian betg pli lavur en Svizra. En il Puschlav hai gia dà in cas nua ch'in emprendist ha interrut l'emprendissadi sco electricist cura ch'el ha udì da la situaziun da taglia. En la branscha da construcziun hajan las cunfinarias ed ils cunfinaris per part gia retratg lur annunzias u schizunt dà giu la plazza.
Sfidas per la stagiun d'enviern
Ils proxims dis metta la directura da l'hotel Morteratsch ensemen il team per la stagiun d'enviern. Cun la situaziun actuala sin il martgà da lavur en il sectur da la gastronomia e hotellaria na possia ella strusch desister da cunfinarias e cunfinaris.
Malgrà tut: Questa cunvegna vala actualmain mo per persunas ch'èn engaschadas dapi ils 17 da fanadur 2023. Collavuraturs che lavuran gia pli ditg en Svizra profiteschan anc d'in termin transitoric fin l'onn 2033. Il problem è perquai actualmain anc survesaivel.
Perspectivas e Speranzas
Bruno Raselli da Gastro Grischun exprima la speranza ch'ils cunfinaris restan en Grischun. Tuttina, la realitad da las taglias ed il manco d'abitaziuns favuraivlas fan che persunas da l'Italia vegnan a star adina pli da rar en Svizra.