En la Scola chantunala grischuna a Cuira marscha per il mument ina massa – e quai gia avant ch'il nov onn da scola ha cumenzà. Quai pervi dal «Swiss TecLadies Camp» ch'ha per la segunda giada lieu en la chapitala grischuna. In camp per mattas tranter 12 e 15 onns che s'interesseschan per il mund da «MINT» (la scursanida per ils pleds tudestgs «Mathematik, Informatik, Naturwissenschaften e Technik»). Uschia vai en il camp per temas sco roboters, programmar, intelligenza artifiziala, realitad virtuala etc.
Las organisaturas dal camp hajan mess ensemen in program vast per las 39 giuvnas, sco che Sandra Weidmann declera.
La mesemna èn stads sin il program trais differents workshops: Programmar codes uschia ch'in pitschen roboter reagescha sin differents cumonds, emprender co duvrar il meglier intelligenza artifiziala en connex cun in «chatbot» – sco era da programmar in agen gieu-online.
Tranter las 39 mattas sa chattan era trais Rumantschas. Ellas èn cuntentas da passentar quest'emna en il camp ed han plaschair ch'i dat ina tala purschida per ellas.
Mo 10 – 15% da las dunnas giuvnas emprendan ina professiun tecnica – e tenor in studi da la «ICT-Berufsbildung Schweiz» vegnian enfin l'onn 2030 probablamain a mancar var 40'000 spezialists e spezialistas en quest sectur.
Perquai sajan talas purschidas, sco quella da las Swiss Tec Ladies, tenor Sandra Weidman fitg impurtantas per promover gia baud las mattas ch'han interess da temas da MINT.
La Scola chantunala grischuna porta sezza il label da «MINT» e porscha perquai gugent maun al camp – quai en furma da localitads e per part era persunal. Da pudair porscher atras quai in'ulteriura purschida da «MINT» ad uffants grischuns davant lur isch-chasa saja en mintga cas in avantatg.
Duvrais in'idea per ina lecziun che tracta las medias? Vulais visitar RTR ed emprender co far videos u identifitgar «fake-news»? U duai RTR vegnir tar vus e far in'emissiun ord scola?
Sut rtr.ch/uffants/scola chattais Vus tut las infurmaziuns.
